«Samuryq-Qazyna» qory elimizdiń jas ǵalymdaryn qoldaýǵa jylyna mıllıon dollardan astam qarjy bólmek
Bul týraly búgin QR Prezıdentiniń «Bolashaq» halyqaralyq baǵdarlamasyn iske asyrý qorytyndylaryna arnalǵan Úkimet otyrysynda atalǵan qordyń basqarma tóraǵasy Ómirzaq Shókeev aıtty.
«Qor Nazarbaev Ýnıversıtetimen birlesip, jas ǵalymdardy qoldaý úshin tehnologııalyq, ınjenerlik ortalyq qurýǵa kiristi. Biz ár jyly 1 mıllıon dollardan astam qarajatty Qazaqstannyń jas ǵalymdary granttaryna jáne olardy qoldaýǵa bólip otyramyz», - dedi ol.
Sonymen qatar qor basshysynyń atap ótýinshe, «Samuryq-Qazyna» Elbasy tapsyrmasyna oraı Bilim jáne ǵylym mınıstrligimen birlesip, dýaldy oqytýdy qolǵa alǵan.
«Byltyrǵy qyrkúıekten bastap 400 stýdent osy baǵdarlama boıynsha bizdiń kompanııalarymyzda oqyp, jumys istep, kompanııalarymyzdyń qyzmetkerleri bolýǵa daıyndalyp jatyr. Bıylǵy qyrkúıekten bastap búl túlekterdiń sanyn myńǵa jetkizemiz degen maqsat qoıyp otyrmyz», - deıdi Ó.Shókeev.