Samuryq-Qazyna korporatıvtik ortalyq qyzmetkerlerin 2 esege qysqartty

NUR-SULTAN. QazAqparat – «Samuryq- Qazyna» ál-aýqat ulttyq qorynda korporatıvtik ortalyq qyzmetkerlerdiń sany 248-den 124-ke deıin azaıdy. Bul týraly qordyń basqarma tóraǵasy Almasadam Sátqalıev málim etti, dep habarlaıdy QazAqparat tilshisi.

«Qor qyzmetin reformalaý 2 baǵyttan turady: jedel jáne júıeli reformalar. Jedel sharalar týraly aıtsaq, biz qordyń korporatıvtik ortalyq qyzmetkerlerin 2 esege qysqarttyq, 248-den 124-ke deıin. Basqarý salasyndaǵy laýazym sany 10-nan 5-ke azaıdy. Sonymen qatar qurylymdyq bólimshilerdiń sany qaıta qaralyp, 27-den 18-ge kemidi. Odan bólek, qordaǵy keńesshiler ınstıtýtynyń jumysy toqtady. Bul salada eńbek etken 106 adam qysqardy», – dedi Almasadam Sátqalıev Ortalyq kommýnıkatsııalar qyzmeti alańynda ótken baspasóz máslıhatynda.

Sondaı-aq, «Samuryq- Qazyna» ál-aýqat ulttyq qorynyń sheteldegi ókildikteri jabylǵan. Onyń qatarynda London, Abý-Dabı, Beıjiń jáne Máskeý bar.

«Joǵaryda atalǵan shuǵyl sharalar jylyna 2 mlrd 600 mln teńgeni únemdeýge septigin tıgizedi. Bul baǵyttaǵy jumystar qor qaramaǵyndaǵy portfeldik kompanııalarǵa da qatysty. Búginde bıýdjetke ózgertýler engizilip jatyr, ol jazda daıyn bolady. Sonyń qorytyndysy boıynsha portfeldik kompanııalar qyzmetine de qysqartýlar júredi dep josparlap otyrmyz. Qor qyzmetindegi jańashyldyqtyń biri – óndiristik qyzmetkerlerdiń jalaqysy 48 paıyzǵa artty», - deıdi ol.

Onyń aıtýynsha, jalaqynyń artýy óndiris salasynda eńbektenip jatqan 200 myń jumysshyǵa qatysty.

Aıta ketsek, buǵan deıin qordyń táýelsiz dırektorlarynyń jalaqysy qysqarǵany aıtyldy.