«Samuryq-Qazyna» kompanııasynda qujat aınalymy 68% oryssha júrgiziledi

ASTANA. QazAqparat - Til saıasaty komıtetiniń uıymdastyrýymen ulttyq kompanııalardyń qujat aınalymyndaǵy memlekettik tildiń úlesine júrgizilgen monıtorıng qorytyndysy taldandy, dep habarlaıdy QazAqparat.

Búginde memlekettik tildiń membasqarý, zań shyǵarý, sot isin júrgizý jáne is-qaǵazdaryn júrgizý tili ekeni «Qazaqstan Respýblıkasyndaǵy til týraly» QR Zańynyń 4-babynda kórsetilgen.

Sh.Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵy taratqan málimetke sensek, bıylǵy І toqsanda ulttyq kompanııalardyń memlekettik tildegi qujat aınalymynyń úlesi 73% quraǵan.

Bul byltyrǵy jyldyń osy kezeńimen salystyrǵanda 37%-ke artyq (2022 jyldyń І toqsany – 36%).

Degenmen, «Samuryq-Qazyna» ulttyq ál-aýqat qory» AQ (32%), «Qazaqstan temir joly» AQ (43%), «Qazposhta» AQ (57%), «Atameken» QR Ulttyq kásipkerler palatasy (61%), «Baıterek» UBH AQ (67%), «QazMunaıGaz» UQ (69%) jáne t.b. kórsetkishteri áli de tómen.

Al «Qazatomónerkásip» UAK» AQ (82%), «Ulttyq aqparattyq tehnologııalar» AQ (82%), «KEGOK» AQ (84%), «Damý kásipkerlikti damytý qory» AQ (85%), «Qazaqstan ınjınırıng» UK» AQ (87%) qujattaryn qazaq tilinde júrgizýde ósim baıqalady.

Jıyn baǵdarlamasyna sáıkes «Kegoc» AQ, «Kazakh Tourism» UK» AQ memlekettik tildiń qoldanys aıasyn keńeıtý baǵytynda atqaryp jatqan jumysy jaıynda baıandama jasady.

Til saıasaty komıteti tóraǵasynyń orynbasary Gúlnar Hodjabergenova sharany qorytyndylaı kele, ulttyq kompanııalardyń ishki qurylymdyq bólimsheleri men enshiles uıymdarynyń qujat aınalymyndaǵy memlekettik tildiń úlesin arttyrý baǵytyndaǵy jumysty kúsheıtý qajettigin erekshe atap ótti.