«Samuryq-Qazyna» «Qazaqstan halqyna» qoryna 130 mlrd teńge aýdarady

ASTANA. QazAqparat – «Samuryq-Qazyna» qory bıyl «Qazaqstan halqyna» qoryna 130 mlrd teńge aýdarady. Bul týraly «Samuryq-Qazyna» qorynyń qoǵammen baılanys, áleýmettik-eńbek qatynasy jáne eńbekti qorǵaý jónindegi basqarýshy dırektory Ǵıbrat Aýǵanov aıtty, dep habarlaıdy QazAqparat tilshisi.

«2022 jyly Samruk-Kazyna Trust qaıyrymdylyq jobalarynyń biryńǵaı operatory búkil Qazaqstan boıynsha 43 áleýmettik bastamany júzege asyrǵanyn taǵy bir ret eske sala keteıin. 500 myńǵa jýyq azamatqa kómek kórsetildi. Bul «Samuryq-Qazyna» qory tobynyń qaıyrymdylyqqa bóletin bıýdjetin 40 paıyzǵa, ıaǵnı 10 mıllıard teńgege deıin arttyrý nátıjesinde múmkin boldy. Osy jobalardy júzege asyrý nátıjesinde respýblıka boıynsha 624 adam jumysqa ornalasty», - dedi Ǵıbrat Aýǵanov baspasóz máslıhaty barysynda.

Onyń atap ótýinshe, qordyń qaıyrymdylyq is-sharalary bıyl da jalǵasatyn bolady.

«Osy jyly da taza paıdanyń 7 paıyzyn «Qazaqstan halqyna» áleýmettik qoryna aýdaramyz. Bul soma shamamen 130 mlrd teńgeni quraıdy. ıAǵnı, qaıyrymdylyqqa bólinetin bıýdjet keminde 13 esege ósedi», - dedi qordyń atqarýshy dırektory.