«Samuryq-Qazyna» ımport úlesin aıtarlyqtaı kemitpek

ASTANA. QazAqparat - Búgin elordada «Otandyq taýar óndirýshilerdiń básekege qabilettigi» forým barysynda «Samuryq-Qazyna» UÁQ» AQ men «Atameken» UKP arasynda ózara is-týraly kelisim bekitildi, dep habarlaıdy QazAqparat tilshisi.

Atalǵan qujatqa «Samuryq-Qazyna» UÁQ» AQ basqarmasynyń tóraǵasy Ahmetjan Esimov pen «Atameken» UKP tóralqasynyń tóraǵasy Tımýr Qulybaev qol qoıdy.

Atalǵan kelisim aıasynda ımportty almastyrýdyń uzaq merzimdi baǵdarlamasyn ázirleý eskerilgen. Bul óz kezeginde taza ımport úlesin eleýli túrde qysqartýǵa negizdelgen. «Samuryq-Qazyna» málimetine qaraǵanda, osyndaı qadam buǵan deıin elimizde óndirilmegen taýarlardy shyǵara alatyn júzdegen kásiporyndardy qurý úshin yntalandyrýshy tetik bolmaq.

Atap aıtqanda, baǵdarlama boıynsha Qordyń kompanııalar toby satyp alatyn taýarlardyń tizimi birlesip qalyptastyrylady. Osydan keıin «Atameken» palatasymen birge Qazaqstanda óndiristi uıymdastyrýǵa áleýetti ınvestorlar arasynda konkýrs ótkizilmek. Óz kezeginde Qor konkýrsty jeńip shyqqandarmen uzaqmerzimdi sharttardy bekitýge ázirligin rastaıdy. Sáıkesinshe, jańa kásiporyndar ımportty almastyratyn ónimderdi el aýmaǵynda óndire bastaıdy.

Qor aldaǵy eki jylda holdıng ishindegi kooperatsııadan shyǵarý esebinen básekeles ortaǵa, ıaǵnı kásipkerlik sýbektileri úshin 700 mlrd teńge somaǵa satyp alýlardy beredi. Osy oraıda kásipkerlerdiń basym bóligine Qordyń satyp alýlary sharalaryna qatysýǵa jol ashylady.

Budan bólek, forým barysynda óńdeýshi ónerkásiptiń básekege qabilettiligin arttyrý jónindegi jobalyq keńseni qurý týraly kelisim bekitildi. Osy qujatqa QR Investıtsııalar jáne damý mınıstri Jeńis Qasymbek, «Samuryq-Qazyna» UÁQ» AQ basqarmasynyń tóraǵasy Ahmetjan Esimov, «Atameken» UKP tóralqasynyń tóraǵasy Tımýr Qulybaev qol qoıdy.