«Samuryq-Qazyna» demeýshilik kómekke bólinetin qarajatty eki esege deıin qysqartty

ASTANA. QazAqparat - «Samuryq-Qazyna» demeýshilik kómekke bólinetin qarajatty eki esege deıin qysqartýdy josparlaýda. Bul týraly búgin «Ekspert» sarapshylyq klýbynyń otyrysynda «Samuryq-Qazyna» AQ Qoǵammen baılanys departamentiniń dırektory Aıdar Mahmetov málim etti.

«Daǵdarys ekpinin aınalyp ótý múmkin emes. Eger jyldar boıynsha alatyn bolsaq, 2013 jyly jalpy ddemeýshilik kómekke 28 mlrd. teńge bólingen, 2014 jyly 33 mlrd. teńge, 2015 jylǵy soma áli naqtylanady, degenmen ol jyl sońynda 16 mlrd., múmkin 17 mlrd. teńge kóleminde shyǵatyn shyǵar. Qarap otyrǵanyńyzdaı, demeýshilik kómek eki esege qysqaryp otyr», - dedi Aıdar Mahmetov. Alaıda, onyń sózine qaraǵanda, eń mańyzdy jobalar boıynsha demeýshilik kólemi qysqarǵan joq. «Bul faktor sóz joq, biziń demeýshilikke zárý birqatar jobalarǵa qatty áser etti. Biraq biz áleýmettik mańyzǵa ıe Arýjan Saınnyń sal aýrýyna, aýtızmge shaldyqqan balalardyń emine qoldaý kórsetip kele jatqan «Qaıyrymdylyq» uıymyna, «Dom» atty qorǵa demeýshilik jasaýdy toqtatqan joqpyz. Biz tek sporttyq saladaǵy demeýshilikti edáýir qysqarttyq. Kelesi jyly da osy soma óspeıdi dep otyrmyz», - dedi A. Mahmetov.