«Samuryq-Qazyna» BJZQ men ekinshi deńgeıli bankterden zaem tartý múmkindigin qarastyrady - Ó. Shókeev

ASTANA. QazAqparat - «Samuryq-Qazyna» Biryńǵaı jınaqtaýshy zeınetaqy qory men ekinshi deńgeıli bankterden zaem tartý múmkindigin qarastyrady. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte «Samuryq-Qazyna» Ulttyq ál-aýqat qory» AQ tóraǵasy Ómirzaq Shókeev osylaı málim etti.

Qor tóraǵasynyń aıtýyna qaraǵanda, qazirgi tańda «Samuryq-Qazynanyń» sheteldik valıýtadaǵy boryshtary shamamen 37 mıllıard dollardy qurap otyr. «Bul boryshtardyń qyzmeti boıynsha bizge birshama valıýta qajet bolatyny sózsiz. Bir ǵana aǵymdaǵy 2015 jyldyń ózinde shamamen 4,7 mıllıard dollar talap etiledi. Budan bólek, biz ınvestıtsııalyq jobalardy júzege asyrý úshin zaem alatyn bolamyz, al ınvestıtsııalyq jobalar aıasyndaǵy mindettemeler boıynsha bizge 1 mıllıard dollardy jabý qajet», - dedi Ó. Shókeev.

Onyń sózine qaraǵanda, aǵymdaǵy jyly zaem alýdaǵy qajettilik 2-2,5 mıllıard dollardyń kóleminde aıqyndalǵan. «Biz osy qarajatty qaıdan alýdy oılastyryp jatyrmyz. Eger syrtqy naryqtardaǵy sharttar biz úshin tartymdy bolsa, onda biz syrtqy naryqtarǵa shyǵamyz. Degenmen, qalyptasqan ahýalǵa baılanysty bizge ishki naryqtan qarastyrǵan abzalyraq. Osyǵan baılanysty «Samuryq-Qazyna» Qory Biryńǵaı jınaqtaýshy zeınetaqy qorynan jáne elimizdegi ekinshi deńgeıli bankterden zaemdar tartý máselesin qarastyrýdamyz», - dedi Ó. Shókeev.