«Samuryq-Qazyna» basqarý deńgeılerin qysqartady

ASTANA. QazAqparat - «Samuryq-Qazyna» qorynda basqarý deńgeıleri qysqartylmaq. Bul týraly búgin Ortalyq kommýnıkatsııalar qyzmetindegi brıfıngte atalǵan qordyń bıznesti damytý jónindegi bas dırektory Berik Beısenǵalıev málim etti.

«Budan buryn «Samuryq-Qazyna» kóbinese jobalardy enshiles bólimsheleri arqyly júzege asyrdy jáne basqarýshy holdıng retinde olarǵa korporatıvti basqarý qaǵıdasy boıynsha jetekshilik etti. Al qazirgi kezde kommertsııalyq negizdelgen aldyńǵy qatarly holdıngter úlgisi turǵysynda jeke ınvestıtsııalyq portfeldi ártaraptandyrý úshin ekonomıkanyń shıkizattyq emes sektorlaryna basymdyq bere otyryp, jobalardy iske asyrý josparlanýda. Osy jumystyń aıasynda kompanııalar tobyndaǵy kompanııalardy eki esege jýyq qysqartý josparlanyp otyr. Alaıda, bul sharalar adamdardyń jumys oryndaryn qysqartyp, jumystan shyǵarý kerek degendi bildirmeıdi», - dedi ol.

B. Beısenǵalıevtiń sózine qaraǵanda, osy baǵytta aýqymdy sharalar atqarylyp, naryqqa erkin jiberýge bolatyn jobalar aıqyndalady. Olar keıinnen saýdalanyp, ary qaraı jeke kapıtaldyń basshylyǵymen jumystaryn jalǵastyrady.

«Dál solaı basqarý deńgeılerin qysqartý josparlanýda. Búginde olardyń kólemi toǵyzǵa deıin jetip otyr. Árıne, bundaı deńgeıler arqyly basqarý óte qıyn. Sondyqtan da biz osy deńgeılerdi kem degende tórtke deıin qysqartýdy qarastyryp otyrmyz», - dedi ol.