«Samuryq-Qazyna» aqparattyq tehnologııalar arqyly kompanııalardyń bıznes múmkindikterin keńeıtpek
«Samuryq-Qazyna Bıznes Servıs» JShS-nyń bas dırektory Davıd Týganov 20 qańtarda Astanada ótken Aqparattyq-kommýnıkatsııalyq tehnologııalar jónindegi saraptamalyq keńestiń barysynda «Samuryq-Qazyna» AQ (budan ári -Qor) aqparattyq tehnologııalarynyń (AT) damýy týraly aıtyp berdi. «Zerde» Ulttyq ınfokommýnıkatsııa holdıngi» AQ-nyń basshysy Ásel Jıenbaevanyń tóraǵalyǵymen ótken is-sharaǵa Qazaqstandyq IT-kompanııalar qaýymdastyǵynyń, sondaı-aq ulttyq jáne sheteldik kompanııalarynyń ókilderi qatysty.
Usynylyp otyrǵan AT-ny damytý tujyrymdamasy Qor kompanııalar tobynyń uzaq merzimdi qunyn arttyrýǵa jáne ulttyq ekonomıkany ártaraptandyrý men jańǵyrtýyna baǵyttalǵan strategııalyq maqsattardy kózdeıdi. Sondyqtan IT-baǵytynyń basty mindeti qazirgi zamanǵy aqparattyq tehnologııalardy paıdalaný esebinen qorjyndy kompanııalardyń bıznes múmkindikterin keńeıtý bolyp tabylady.
«Sońǵy 3 jyl ishinde Qor kompanııalarynyń tobynda birneshe bastamalar júzege asyryldy. Atap aıtqanda, bul AT-lar departamentteriniń qurylymynyń qaıta qaralýy, qorjyndy kompanııalarda CIO (aǵylsh.tilinen: Chief Information Officer, AT jónindegi dırektor) ınstıtýtynyń engizilýi, derekterdi basqarý jáne kásiporyn qurylymy jónindegi keńselerdiń qurylýy. Qazirgi tańda jalpy qyzmet kórsetý ortalyqtary, quzyret ortalyqtary men AT-nyń kıberqaýipsizdigi jónindegi ortalyqtar ashylýda. Biz bıznes suranysyna ıe AT-lar, kıberqaýipsizdik jáne derekterdi basqarý mamandaryn ósirý maqsatymen tehnıkalyq joǵary oqý oryndarymen belsendi ózara qarym-qatynasty jalǵastyramyz», - dedi D. Týganov. Sondaı-aq, ol Qor kompanııalar tobynyń keshendi kemeldiligin arttyrýǵa baǵyttalǵan «Samuryq-Qazyna» AQ-nyń aýqymdy Transformatsııalaý baǵdarlamasy aıasynda qyzmetkerler men tehnologııalar damytýyna ınvestıtsııalaý qajettiligin, sonymen qatar - baǵdarlamalyq qamtamasyz etýdiń sapasyna, senimdiligine jáne ıkemdiligine qoıylatyn talaptardy arttyrý kerektigin atap ótti.
«Tıimdi ulttyq aqparattyq-kommýnıkatsııalyq tehnologııalar ekojúıesi bolmasa Qordyń kompanııalar tobynda AT-nyń nátıjeli damýy múmkin emes, sondyqtan biz «Zerde» holdıngi, otandyq jáne álemdik ónim berýshiler, ýnıversıtet ókilderi jáne bıznes-kompanııalarmen yntymaqtastyǵymyzdy jalǵastyramyz. Biz «Zerde» usynǵan ózara yntymaqtastyq alańyna rızashylyǵymyzdy bildere otyryp, elimizdegi IT-salasyna qatysty máselelerdi ashyq talqylaýǵa daıynbyz», - dedi D.Týganov.
Kezdesý qorytyndysy boıynsha qatysýshylar kelesi saraptamalyq keńes otyrystarynyń birinde «Samuryq-Qazyna» AQ-nyń satyp alý jańa tártibin, sonyń ishinde, baǵdarlamalyq qamtamasyz etý men AT qyzmetterine qatysty máseler usynylady dep kelisti.