«Samuryq-Qazyna» AQ Nıderlandydaǵy sot talqylaýynda protsessýaldyq jeńiske jetti

NUR-SULTAN. QazAqparat - 2021 jyldyń 28 sáýirinde Amsterdam aýdandyq soty Anatol Statı, Gabrıel Statı, Ascom S. A. jáne Terra Raf Trans Traiding Ltd (Statı) «Samuryq-Qazyna «UÁQ» AQ-ǵa qarsy bastaǵan sot protsesinde aralyq sheshim shyǵardy.

Amsterdam aýdandyq soty Gaaga apellıatsııalyq soty sheshim shyǵarǵanǵa deıin sot isin toqtata turýǵa sheshim qabyldady, dep habarlaıdy QazAqparat QR Ádilet mınıstrliginiń baspasóz qyzmetine siteme jasap.

Esterińizge sala keteıik, 2020 jylǵy 18 jeltoqsanda basqa sot talqylaýy sheńberinde Nıderlandynyń Joǵarǵy Soty Amsterdam Apellıatsııalyq sotynyń KMG Kashagan B. V.-daǵy Qor aktsııalaryna ýaqytsha tyıym salýǵa qatysty 2019 jylǵy 7 mamyrdaǵy sheshimin joıyp, isti basqa sotqa - Gaaga apellıatsııalyq sotyna qaıta qaraýǵa jiberdi.

Amsterdam aýdandyq soty óz sheshiminiń sebebin eki istiń de KMG Kashagan B.V.-daǵy Qordyń aktsııalaryna tyıym salýdyń quqyqtyq mártebesine qatystylyǵymen túsindirdi.

Sonymen qatar, sot tyıym salýdy kúshinde qaldyrýdyń quqyqtyq negizderine baılanysty suraqqa jaýap Qordyń jáne Respýblıkanyń májbúrlep oryndaýdan ımmýnıtetke negizdelgen dálelderin eskere otyryp jáne osy másele boıynsha Joǵarǵy sottyń sheshimi aıasynda qarastyrylyp berilý kerek dep eskertti. Amsterdam aýdandyq soty qazirgi sot isinde protsessýaldyq qıyndyqtarǵa ákeletin qarama-qaıshy sheshimderdi boldyrmaýǵa tyrysý qajet dep atap ótti.

Gollandııalyq sottyń sheshimi Statı, olardyń demeýshileri Denıel Chepmen jáne onyń kompanııalary úshin taǵy bir túńilýshilik bolyp tabylady, óıtkeni bul olardyń alaıaqtyq jolmen alynǵan tórelik sheshimdi oryndaý jónindegi aǵymdaǵy naýqanyn odan ári álsiretti.