«Samuryq-Qazyna» AQ qyzmetkerleriniń sany eki esege qysqardy

NUR-SULTAN. QazAqparat – «Samuryq-Qazyna» AQ-nyń qyzmetkerler shtaty 2 ese qysqartyldy. Bul týraly atalǵan kompanııanyń qoǵammen baılanys jáne ózgeristerdi basqarý jónindegi dırektory Ǵıbrat Aýǵanov málim etti, dep habarlaıdy QazAqparat tilshisi.

«Memleket basshysynyń tapsyrmasynan keıin kompanııada birqatar shara qolǵa alyndy. Aýqymdy jumys júrip jatyr. Shtat 2 esege qysqartylyp, qyzmetkerlerdiń sany azaıdy. Basqarý laýazymy da eki esege deıin qysqardy. Sonymen qatar kompanııadaǵy keńesshiler ınstıtýty men qordyń sheteldegi ókildikteri jabyldy», - dedi Ǵıbrat Aýǵanov onlaın ótken baspasóz máslıhatynda.

Onyń aıtýynsha, bıyl 1 sáýirden bastap «Samuryq-Qazyna» AQ-da satyp alýdyń jańa erejesi engizildi.

«Satyp alýdyń jańa erejesi qoǵam men quzyrly organdardyń talqysynan ótti. Jańa erejede biz barynsha ashyqtyqty qamtamasyz etýge tyrystyq. Laýazymdy tulǵalar men qyzmetkerlerdiń korporatıvtik jáne áleýmettik jaýapkershiligi kúsheıtildi. Sol sııaqty atalǵan salaǵa jaýapty jetekshiler taǵaıyndaldy. Taǵy bir aıtyp ótetin jaıt, bıyl jyl basynda óndiristik qyzmetkerlerdiń jalaqysy artty. Odan bólek, birqatar áleýmettik-qaıyrymdylyq baǵyttaǵy is-sharalar iske asyp jatyr», - deıdi ol.

Eske sala ketsek, aqpan aıynda ótken QR Prezıdenti janyndaǵy Sheteldik ınvestorlar keńesiniń kezekten tys otyrysynda Memleket basshysy Qasym-Jomart Toqaev «Samuryq-Qazyna» AQ-da túbegeıli qaıta qurý jumystary júrip jatqanyn aıtqan edi.

Al sáýir aıynyń basynda Q.Toqaev «Samuryq-Qazyna» basshysyn qabyldap, birqatar tapsyrma berdi.

«Samuryq-Qazyna» basshysy Almasadam Sátqalıev Prezıdentke qordyń óndiristik, qarjylyq kórsetkishteri men osy jylǵa arnalǵan boljamdary jóninde baıandady.