«Samuryq-Qazyna» AQ basqarmasynyń jańa quramy bekitildi

ASTANA. QazAqparat - 2016 jyldyń 28 qańtarynda QR Premer-Mınıstri Kárim Másimovtiń tóraǵalyǵymen «Samuryq-Qazyna» AQ dırektorlary Keńesiniń otyrysy ótti. Onda aǵymdaǵy birqatar mańyzdy máseleler, sonyń ishinde, kompanııanyń Basqarma quramy men onyń enshiles kásiporyndarynyń dırektorlary Keńesiniń quramy da qaraldy. Bul týraly atalǵan kompanııanyń baspasóz qyzmeti habarlaıdy.

Transformatsııa baǵdarlamasy aıasynda 2016 jyldyń 5 qańtarynan bastap Qor qyzmeti jańa basqarý qurylymy men shtattyq kestege kóshirildi.

Osyǵan oraı «Samuryq-Qazyna» dırektorlar Keńesiniń sheshimimen «Samuryq-Qazyna» AQ Basqarmasynyń tómendegideı jańa quramy bekitildi:

Shókeev Ómirzaq Estaıuly - basqarma tóraǵasy.

Baljıt Kaýr Grıýal Djasvant Sıngh - strategııa jáne aktıvter portfelin basqarý jónindegi basqarýshy dırektor. Azııa Damý Banki Ulttyq Qorynyń Damý baǵdarlamalary jónindegi aǵa keńesshisi, Kuwait Investment Authority & Kuwait Finance House basqarýshy dırektory, keıin kele vıtse-tóraıymy, ABN AMRO Bank, Maybank Malaysia jáne Deutsche Bank vıtse-prezıdenti qyzmetterin abyroımen atqarǵan. Atalǵan bankter men qarjylyq kompanııalar, ulttyq ál-aýqat qorlaryndaǵy joǵary basqarýshylyq halyqaralyq tájirıbesi 15 jyl;

Bahmýtova Elena Leonıdovna - qarjy jáne operatsııalar jónindegi basqarýshy dırektor. Buǵan deıin ol Qordyń basqarma tóraǵasynyń orynbasary qyzmetin atqarǵan bolatyn. «Samuryq-Qazyna» Qoryna deıin QR Ulttyq banki qarjylyq qadaǵalaý departamentiniń dırektory, Qazaqstan Respýblıkasy qarjy naryǵy men qarjylyq uıymdardy retteý jáne qadaǵalaý jónindegi Agenttiginiń tóraıymy qyzmetterin atqarǵan;

Bıtenov Ǵanı - quqyqtyq súıemeldeý jáne táýekelder jónindegi basqarýshy dırektor. Halyqaralyq (Bracewell&Giuliani) jáne qazaqstandyq zańgerlik kompanııalarda 10 jyldan astam ýaqyt jetekshi qyzmetter atqarǵan. Eýropa qaıta qurý jáne damý banki, MerrillLynchInternational, JPMorganChaseBankN.A. syndy álemdik deńgeıdegi iri ınvestıtsııalyq bankterdiń, Qazaqstannyń iri ekinshi deńgeıli bankteriniń, «QazAtomÓnerkásip» UAK» AQ, «QazMunaıGaz» BÓ» AQ, Qazaqstan damý bankiniń múddesin qorǵaǵan.

Beısenǵalıev Berik Tursynbekuly - aktıvterdi ońtaılandyrý jónindegi basqarýshy dırektor. Osyǵan deıin ol Qordyń bıznesti damytý jónindegi bas dırektory bolyp eńbek etti. «Samuryq-Qazyna» Qoryna qyzmet aýystyrǵanǵa deıin ol «ATFBank» AQ basqarýshy dırektory - basqarma tóraǵasynyń birinshi orynbasary, «Astana Capital Investment Group» ınvestıtsııalyq kompanııasynyń bas dırektory, «KazAgro» holdınginiń basqarma tóraǵasy qyzmetterin atqarǵan;

Tájibaev Ulan Qalmuhanuly - adam resýrstaryn basqarý jónindegi basqarýshy dırektor bolyp taǵaıyndaldy. Buǵan deıin Qordyń apparat basshysy bolyp eńbek etken. Ál-Farabı atyndaǵy QazMÝ(Halyqaralyq qatynastar men quqyq) túlegi, MBA Instituto de Empresa (Ispanııa) Executive mártebesin alǵan.

Sonymen qatar dırektorlar Keńesi «Samuryq-Qazyna» AQ basqarma múshesi B.T. Beısenǵalıevtiń «QazMunaıGaz» UK» AQ dırektorlary keńesine múshe etip saılaýǵa ruqsat berdi.

Esterińizde bolsa, «Samuryq-Qazyna» AQ Transformatsııa baǵdarlamasy aıasynda Qor qyzmetin jańa uıymdastyrýshylyq qurylymǵa kóshiretinin 2015 jyldyń jeltoqsan aıynda habarlaǵan bolatyn. Jańa qurylym Qordaǵy bıznes-protsesterdiń tıimdiligin tereń saralaı otyryp, ári álemdegi jetekshi ultttyq ál-aýqat qorlary men týra ınvestıtsııalyq qorlardyń ozyq tájirıbelerin eskere otyryp túzilgen.

Jańa uıymdastyrýshylyq qurylymda Basqarma tóraǵasynyń orynbasary laýazymdary qysqartylyp, basqarýshy dırektorlar sany eki esege azaıtylǵan.