«Samuryq-Qazyna» kásibı sport klýbtaryna bóletin qarajatty qysqarta ma
«Májilis depýtaty Nartaı Sársenǵalıuly «Samuryq-Qazyna» qorynan basketbol, fýtbol, velosportqa mamandanǵan kásibı sport klýbtaryna jylyna 65 mln dollar bólinetinin aıtyp, depýtattyq saýal qoıǵan edi. Keıin áleýmettik jelide, el ishinde mundaı ysyrapshyldyqty toqtatý kerek degenge saıatyn pikir kóp aıtyldy. Osy synnan qorytyndy shyǵardyńyzdar ma? Sportqa «Samuryqtan» qarjy bólýdi toqtatý nemese azaıtý týraly josparlaryńyz bar ma?» - dep surady jýrnalıst.
«Samuryq-Qazyna» ókili aqshany sportqa qor bólgenimen, ony kimge qanshadan úlestirý kerektigin Týrızm jáne sport mınıstrliginiń ózi sheshetinin aıtty.
«Bul jerde aıtý kerek, «Samuryq-Qazyna» sportqa jyl saıyn Úkimet qabyldaǵan sheshimder aıasynda qarajat bólip otyrady. Bul qarajat bizdiń esepterde kórsetilgen. Soma jyldan-jylǵa bir deńgeıde. Biraq bul qarajatty ári qaraı Týrızm jáne sport mınıstrligi taratady. Qarajattyń ózgerýine kelsek, ol kelip túsken suranysqa baılanysty. Jyl saıyn soma ózgerip otyrady. Biraq kóbeıip jatyr dep aıta almaımyz. Bul jerde Týrızm jáne sport mınıstrligi qansha surasa, sonsha beremiz degen sóz emes. Bizde de shekteýler bar, Sonyń aıasynda bólemiz», - dedi ol.
Departament dırektorynyń sózinshe, 2020 jyldan beri «Samuryq-Qazyna» eshbir sport klýbyna tikeleı qarjy aýdarmaǵan.
«Bul salaǵa qarjy bólýden bas tartý máselesine kelsek, qazir qordyń qaramaǵynda sport klýbtary joq. Kezinde bolǵanymen, tolyqtaı Sport mınıstrligine berilgen. 2020 jylǵa deıin bárin berip shyqtyq. Qazirgi tańda sport jónindegi biryńǵaı operator degen uıym bar. Qatelespesem, 2020-21 jyldardan bastap biz bólgeni aqshany qalaı úlestiretinin Týrızm jáne sport mınıstrligi sheshetin bolǵan», - dedi Mırat Ótepov.