«Samuryq-Qazyna» byltyr Úkimetke 1,5 trln teńgege jýyq aqsha aýdarǵan

<p>ASTANA. KAZINFORM &ndash; &laquo;Samuryq-Qazyna&raquo; ál-aýqat qorynyń Ekonomıka jáne qarjy jónindegi basqarýshy dırektory Aıdar Rysqulov byltyr qor Úkimetke 513 mlrd teńgeniń dıvıdentin aýdarǵanyn aıtty.</p>

«Qor Úkimettiń paıdasyna aýdarylatyn tólemderdi ulǵaıta beredi. Jyl saıyn tólenetin dıvıdendterdiń mólsheri qordyń Úkimettiń tapsyrmasy boıynsha iske asyrylatyn jobalardyń qarjysyn qosqanda portfeldik kompanııalardan alatyn dıvıdendterdiń 50%-yna teń. 2023 jyldyń qorytyndysy boıynsha bul norma asyra oryndaldy. Úkimetke dıvıdendterdiń 78%-y jiberildi. 2023 jyldyń qorytyndysy boıynsha dıvıdendter kólemi shamamen 513 mlrd teńge boldy. Jalpy «Samuryq-Qazyna» aktsıonerlik qoǵamy 2023 jyly aktsıonerdiń (Úkimet) paıdasyna 1,5 trln teńgege jýyq rekordtyq soma tóledi», - dedi Aıdar Rysqulov baspasóz máslıhatynda.

Jalpy byltyr qorǵa múshe kompanııalardyń kirisi 4% ósip, 15,4 trln teńgege jetken.

«Aktıvter ótken jylmen salystyrǵanda 10% ósti. Buǵan toptyń birqatar negizgi óndiristik kórsetkishteriniń ósýi áser etti. Ýran óndirý kólemi 18,1 myń tonnaǵa jetip, «QazAtomÓnerkásip» aktsıonerlik qoǵamynyń kirisi aıtarlyqtaı ósti.

«QTJ» aktsıonerlik qoǵamynyń temirjol arqyly júk aınalymy 262,4 mlrd tonna/shaqyrym boldy. Bul byltyrmen salystyrǵanda 7% artyq. QazaqGaz-dyń tabıǵı gazdy óndirý kólemi 24,1 mlrd tekshe metrge jetip, byltyrǵydan 1,4 mlrd tekshe metrge artty.

«QazMunaıGaz» AQ-nyń munaı men gaz kondensatyn óndirý kólemi 23,5 mln tonna deńgeıine jetti. Bul 2022 jylǵy kórsetkishterden 6,8% joǵary. Alaıda kompanııa qyzmetiniń nátıjelerine munaı baǵasynyń aıtarlyqtaı tómendeýi birshama áserin tıgizdi», - dedi qordyń basqarýshy dırektory.