Samokatpen júk tasymaldaýǵa tyıym salynady
«Elektr samokatta júkter men jolaýshylardy tasymaldaýǵa tyıym salynady. Elektr samokat júrgizýshiler jol qıylystary men jaıaý júrginshiler ótkelderinen jaıaý ótýi kerek», - dedi Májilis depýtaty Ekaterına Smyshlıaeva.
Onyń aıtýynsha, kóliktiń osy túrin damytýdaǵy problemalardyń biri – arnaıy bólingen joldar men jolaqtar túrindegi qalalyq ınfraqurylymnyń bolmaýy.
«Jekemenshik elektr samokattardyń kóbeıýin, Qazaqstan naryǵynda kıksherıng servısiniń paıda bolýyn eskersek, osyndaı kólikke beıimdelmegen, burynnan bar ınfraqurylymǵa túsetin júkteme jaqyn arada artady. Sondyqtan jedel túrde negizgi erejelerdi engizý qajet», - dedi depýtat.
Budan buryn habarlanǵandaı, búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine jol júrisin uıymdastyrý máseleleri boıynsha ózgerister men tolyqtyrýlar engizý týraly» Zańy qabyldandy. Qujat aıasynda elektr samokattarmen jolda júrý tártibi retteledi.
«Elektr samokattyń joldyń júrý bóliginiń oń jaq shetimen, onyń ishinde avtobýs jolaǵymen bir qatarda júrýine jol beriledi. Alaıda, bul úshin júrgizýshi 18 jasqa tolýy jáne shlem kııýi kerek. Sondaı-aq onyń ústinde jaryq shaǵylystyratyn kıim men kez kelgen sanattaǵy júrgizýshi kýáligi bolýy qajet», - dedi Ekaterına Smyshlıaeva.