Sammıt: Qazaqstan qysqa merzimde 400 mln dollar bolatyn 100 túrli taýar eksporttaýǵa daıyn

JIDDA. QazAqparat – Búgin «Ortalyq Azııa + Shyǵanaqtaǵy arab memleketteriniń yntymaqtastyq keńesiniń» birinshi sammıtinde Prezıdent Qasym-Jomart Toqaev saýda-ekonomıkalyq baılanystardy keńeıtýge qatysty usynys aıtty, dep habarlaıdy QazAqparat tilshisi.

«Yntymaqtastyqty odan ári nyǵaıtý úshin birneshe basym baǵyt boıynsha óz pikirimdi ortaǵa salǵym keledi. Eń aldymen, bul – saýda-ekonomıkalyq baılanystardy keńeıtý. Sońǵy jyldary bizdiń aımaqtyń yntymaqtastyq keńesi elderimen saýda-sattyǵy qarqyndy damı bastady. Muny erekshe atap ótken jón. Biraq kórsetkishter bizdiń áleýetimizdiń tolyq paıdalanylmaı otyrǵanyn kórsetedi», - dedi Qasym-Jomart Toqaev.

Bul turǵyda Prezıdent taýar aınalymyn aıtarlyqtaı arttyrý úshin atalǵan elderde barlyq múmkindik bar ekenin aıtty.

«Ol úshin ózara saýda nomenklatýrasyn ulǵaıtý qajet. Mysaly, Qazaqstan qysqa merzimde quny shamamen 400 mıllıon dollar bolatyn 100 túrli taýar eksporttaýǵa daıyn», - dedi Memleket basshysy.