«Samǵaý» jýrnalıster baıqaýy: Beısen Quranbek atyndaǵy syılyq ıegeri anyqtaldy
Bul qurmetke oblystyq «Jetisý» telearnasy «Jańalyqtar» bóliminiń bas redaktory Gúljanat Maquljanova ıe boldy.
Marapattaý rásiminde oblys ákimi Qanat Bozymbaev óńirdiń damýyna úles qosyp júrgen jýrnalıster qaýymyn quttyqtap, eńbekterine tabys tiledi.
«Sizder, jýrnalıster, qoǵamdyq ómirdegi mańyzy erekshe ári jaýapkershiligi mol kásiptiń ıesisizder. Ýaqytpen sanasýdy bilmeıtin, ózekti máselelerdiń, tótenshe oqıǵalardyń bel ortasynda júretin tilshilerdiń eńbegi árdaıym baǵalaýǵa laıyq. Táýelsiz Qazaqstannyń, sonyń ishinde Almaty oblysynyń da mereıli sharalary, ósý kezeńderi buqaralyq aqparat quraldarynda úzdiksiz jaryq kórip keledi. Obektıvti baılanys arnasy bola otyryp, sizder halyqty ǵana emes, oblys basshylyǵyn da aqparattarmen habardar etip otyrsyzdar, sóıtip bizge turǵyndardyń ózekti máselelerin sheshýge kómek etip kelesizder. Sondyqtan biz úshin jýrnalıster Jetisý aımaǵyn damytý jolynda árdaıym senimdi áriptes dep sanaımyn. «Samǵaý» baıqaýy — jaqsy dástúr. Degenmen kelesi jyly konkýrsty uıymdastyrýda jańashyldyq engizip, syılyq kólemin ulǵaıtýǵa ýáde beremin. El Táýelsizdiginiń mereıli 30 jyldyǵyndaǵy sizder úshin bul marapattyń orny erekshe bolady dep oılaımyn», - dedi Qanat Bozymbaev.
Jalpy bul baıqaý bıyl 5-shi ret ótkizilip otyr. Baıqaýǵa 120-dan astam ótinish kelip túsken. Sonyń ishinde BAQ-tyń 33 ókili jeńimpaz atandy. Birinshi oryn ıegerleri retinde «Kerbulaq juldyzy» gazetinen Azamat Aqylbekov, «Zaman jarshysy» basylymynyń tilshisi Burym Orynbasar, «Jetisý» telearnasynyń qyzmetkerleri – redaktor Jadyra Maratova, operator Rızat Qydyralın, prodıýsser Ádilbek Abılov, ardager fotograf Nurmanbet Qızatuly, «Egemen Qazaqstan» ınternet saıtynyń redaktory Dınar Kerim, «Karasayinfo.kz» jelilik basylymynyń redaktory Atlana Isaeva, «Jetisý» gazetiniń dızaıneri Saqyp Tókeeva, bloger, Panfılov aýdany ákiminiń baspasóz hatshysy Nurbol Qanaǵat
marapattaldy. Júldegerlerdiń bárine arnaıy statýetkalar, dıplomdar men aqshalaı syılyqtar berildi. «Oblys jýrnalıstıkasy salasyna qosqan úlesi úshin» nomınatsııasyn «Ognı Alataý» gazetiniń bas redaktory Atsalım Idıgov ıelenip, jýrnalıster atynan rızashylyq tilegin bildirdi.
Beısen Quranbek atyndaǵy júldeniń ıegeri, jýrnalıstıkada 30 jylǵa jýyq eńbek ótili bar jýrnalıst Gúljanat Maquljanova óziniń tolqynysty áserin jasyrǵan joq.
«Beısen Quranbekpen kózi tirisinde áriptes, syılas, zamandas boldyq.
Beısenniń atyndaǵy nomınatsııanyń tuńǵysh ıegeri bolý - men úshin bir jaǵynan qýanysh, ekinshiden, úlken jaýapkershilik. Ol bizge ári basshy ári tálimger boldy. Salmaqty jobalardy, túrli fılmder men habarlardy birge jasadyq. Onyń senim
artqany meni únemi alǵa jeteleıtin. «Samǵaý» baıqaýyna Beısen Quranbek atyndaǵy nomınatsııanyń qosylǵany – bárimiz úshin de zor mártebe, - dedi Gúljanat Maquljanova.
Eske salsaq, 2020 jyly 18 mamyr kúni belgili jýrnalıst Beısen Quranbek 49 jasqa qaraǵan shaǵynda dúnıeden ótti. Keıin Beısen Quranbek atyndaǵy «Jiger» baıqaýy jarııalanyp, jeńimpazdary anyqtaldy.