Sambodan álem kýbogyna 16 memleketten sportshylar qatysady

ASTANA. QazAqparat - 6-8 shilde aralyǵynda EKSPO-2017 halyqaralyq mamandandyrylǵan kórmesi aıasynda ótetin sambodan álem kýbogyna álemniń 16 elinen kelgen sportshylar qatysady, dep habarlaıdy QazAqparat tilishisi.

Búgin osy baıraqty básekege oraı baspasóz máslıhaty ótti.

«Sambonyń halyqaralyq dárejedegi mártebesi jyl ótken saıyn artyp keledi. Atalǵan sharaǵa 16 el qatysady. Erteń saıysqa arnaıy Halyqaralyq sambo federatsııasynyń prezıdenti Borıs Şestakov keledi», - dedi Halyqaralyq sambo federatsııasynyń atqarýshy komıtetiniń múshesi Mýn Chon Gym.

Jarysqa álemniń 16 memleketinen 200-den asa samboshylar qatysady. Atap aıtqanda, Armenııa, Ázerbaıjan, Belorýssııa, Bolgarııa, Germanııa, Grýzııa, Moldova, Reseı, Rýmynııa, Túrkııa, Ózbekstan, Qyrǵyz Respýblıkasy, Ońtústik Koreıa, Japonııa, Tájikstan, AQSh elderiniń samboshylary baq synaspaq. Kýbok 9 salmaq dárejesinde erler arasynda (52, 57, 62, 68, 74, 84, 90, 100 kelige deıin jáne 100 keliden asa), áıelder arasynda (48, 52, 56, 60, 64, 68, 72, 80 kelige deıin jáne 80 keliden asa) jáne jaýyngerlik sambodan (52, 57, 62, 68, 74, 84, 90, 100 kelige deıin jáne 100 keliden asa) sarapqa salynady.

«Qazaqstannyń Sambo federatsııasynyń barlyq jerde fılıaly jumys jasap jatyr. Qazirgi tańda Qazaqstanda sambomen aınalysatyn 7 myńǵa jýyq bala bar. 1930 jyly ómirge kelgen sambo - birneshe sport túrleriniń qosyndy túri. Onyń ishinde Qazaq kúresi, grýzın jáne orys kúres túrleriniń ádisteri bar. Osy jolǵy jarys óte tartysty bolady degen oıdamyn», - deıdi Qazaqstan sport jáne jaýyngerlik sambo kúresi federatsııasynyń vıtse prezıdenti Rafık Valıev.