Samarqand jaýhary BUU-ǵa syıǵa tartyldy

ASTANA. QazAqparat - Ózbekstan prezıdenti Shavkat Mırzıeev Ózbekstan atynan BUU-ǵa baǵaly metaldardan jasalǵan Regıstan alańynyń maketin syıǵa tartty, dep habarlaıdy «QazAqparat» HAA  uznews.uz-ge silteme jasap.

Syılyq tabystaý sharasyna BUU bas hatshysynyń orynbasary Djen Bıgl, Bas Assambleıa sessııasyna kelgen dıplomattar, BUU aqparat ortalyǵynyń qyzmetkerleri qatysty. Regıstan alańynyń maketi Ózbekstannyń eń tańdaýly qolóner sheberlerinyń qolynan shyqqan jáne asyl metaldarmen, keremet ulttyq órnekpen bezendirilgen.

«Ózbekstannyń bet beınesine aınalǵan atalǵan eksponattyń BUU-y shtab-páteriniń eń kórnekti oryndarynyń biri - Qaýipsizdik Keńesi jáne BUU Bas Assambleıasy zaldarynyń ortasyndaǵy dálizge ornalasqandyǵy tereń maǵynaǵa ıe», - dedi Ózbekstan prezıdenti.

BUU Bas hatshysynyń orynbasary Djen Bıgl el prezıdentine mundaı keremet ári baǵaly syılyǵy úshin alǵysyn bildirdi. Regıstan alańy Samarqand qalasynyń jaýhary, júregi sanalady. Regıstan sóziniń ózi «qumdy jer» degendi bildiredi. Regıstan mońǵol basqynshylyǵyna deıin qolóner men saýda-sattyq ortalyǵy retinde tanylǵan. Onyń úsh jaǵynda da sáýletti ǵımarattar ornalasqan: Ulyqbek medresesi (1417 - 1420), Sher-Dor medresesi (1619 - 1636), Tıllıa-Karı medresesi (1647 - 1660).