«Samara-Shymkent» trassasynda 70-ke jýyq ózbekstandyq qalyp qoıdy

AQTÓBE. QazAqparat – Aqtóbe oblysynda aýa raıyna baılanysty joldar jabylyp, trassada qalyp qoıǵan avtobýstardyń jolaýshylary mektep pen meshitke jetkizildi, dep habarlaıdy QazAqparat tilshisi.

Búgin Aqtóbe oblysynda qutqarýshylar jolaýshylar mingen avtobýstardy jylytý beketterine jetkizdi.

Atap aıtqanda, «Samara-Shymkent» tasjolynyń Yrǵyz aýdany mańynda jol boıynda qalyp qoıǵan adamdar aýyldaǵy orta mektepke ornalastyryldy. Avtobýsta Qazaqstannyń úsh azamaty men Ózbekstan Respýblıkasynyń 38 azamaty boldy.

Málim etilgendeı, Ózbekstan azamattary mingen taǵy bir avtobýs atalǵan trassa boıynda qalyp qoıǵan.

«Samara-Shymkent tasjolynyń Áıteke bı aýdany Qarabutaq aýyly mańynda da avtobýs turyp qaldy. Onda 31 ózbekstandyq boldy. Qutqarýshylar jolaýshylardy Qarabutaq aýylynyń meshitine ornalastyrdy. Negizi jol aýa raıy qolaısyz bolǵan soń jabyldy. Sóıtip adamdar jolda kútti. Biraq jolaýshylar avtobýsy úshin bul qıyn bolyp, adamdar jylytý beketterine jetkizildi», - dep habarlady Aqtóbe oblystyq Tótenshe jaǵdaılar departamentiniń baspasóz qyzmetinen.

Aıta keteıik, qazirgi kezde Aqtóbede joldar ashyq.

Eske salsaq, Aqtóbede boran arty qatty aıazǵa ulasyp, oqýshylar onlaın sabaqqa kóshti.

Foto: Aqtóbe oblystyq TJD baspasóz qyzmeti