«Samara-Shymkent» trassasynda 5 adam, sonyń ishinde 2 bala qaza boldy

QYZYLORDA. QazAqparat - Qyzylorda oblysynda jol-kólik oqıǵasynan bes adam qaza boldy. Olardyń arasynda eki bala bar, dep habarlaıdy QazAqparat tilshisi.

Jol apaty búgin, 26 shildede túngi saǵat úsh shamasynda Jalaǵash aýdanyna qarasty Tań aýyly tusyndaǵy «Samara-Shymkent» avtojolynyń boıynda bolǵan.

«Oqıǵa ornynda 27 jastaǵy azamattyń basqarýyndaǵy «Toyota Camry» jáne 42 jastaǵy azamattyń basqarýyndaǵy «Daewoo-Nexia» jeńil avtokólikteri soqtyǵysqan. Saldarynan eki júrgizýshi, «Daewoo-Nexia» kóligindegi Túrkistan oblysy Ordabasy aýdanynda turatyn 42 jastaǵy jolaýshy, 6, 10 jastaǵy eki bala kóz jumdy», – dep málim etti Qyzylorda oblystyq Tótenshe jaǵdaılar departamentinen.

Vedomstvo málimetinshe, oqıǵa ornynda Tótenshe jaǵdaılar departamenti, «Josaly» kúrejol medıtsınalyq beketi, jedel járdem brıgadasy, aýdandyq polıtsııa bóliminen kelgen mamandar tıisti jumystar atqarǵan.

«Atalǵan derek boıynsha QR Qylmystyq kodeksiniń 345-baby 4-bóligimen​ (Kólik quraldaryn basqaratyn adamdardyń jol júrisi​ nemese kólik quraldaryn paıdalaný qaǵıdalaryn buzýy) sotqa deıingi tergep-tekserý bastaldy. Tıisti saraptamalar taǵaıyndaldy. Oqıǵanyń mán-jaıy anyqtalyp jatyr», - dedi Qyzylorda oblystyq Polıtsııa departamentinen.