Samal Eslıamova «Mədenıet salasynyń úzdigi» tósbelgisimen marapattaldy
Kesh shymyldyǵyn Qazaqstannyń eńbek sińirgen qaıratkeri, teatrdyń dırektory Ashat Maemırov ashyp, kórermenderge teatrdyń qonaqtaryn tanystyryp ótti.
«Abaı-Toǵjan» mýzykalyq dramasy adamzat tarıhyndaǵy birtýar tulǵalardyń bolmys-bitimindegi jasampaz rýh – balalyq shaqtan bastaý alatyn, jas urpaqtyń dúnıe tanymyna, jan dúnıesine, rýhanı bolmysynyń qalyptasýyna áser etetin Abaı ǵumyrynyń bozbala kezeńin arqaý etedi. Atalǵan qoıylymda Qazaqstannyń eńbek sińirgen qaıratkeri Samal Eslıamova jas Abaıdyń anasy Uljannyń rólin somdady.
Spektaklden keıin alǵashqy bolyp sóz tizginin alǵan mınıstr Aqtoty Rahmetollaqyzy qazaq sahnasyna jańa jas teatr kelgenin, jas bolsa da, talantty akter, aktrısalardyń ónerine tánti bolǵanyn jetkizdi. Sonymen qatar, teatr bir adamnyń eńbegi emes, barlyq ujymnyń eńbegi ekenin, endi osy Mýzykalyq jas kórermen teatrynyń turaqty kórermeni bolatynyn, atalǵan teatrdyń bolashaǵy jarqyn bolatynyna senimdi ekenin aıtty.
Mınıstr Mýzykalyq jas kórermen teatrynyń aktrısasy Samal Eslıamovanyń qorjyny kezekti marapatpen tolyqqanyn atap ótip, Reseı kınematografııa óneri akademııasynyń «Nıka» júldesin tabystap, bylaı dep quttyqtady:
«Qurmetti Samal Іlııasqyzy!
Sizdi búgingi marapattaryńyzben shyn júrekten quttyqtaımyn!
2018 jyly kórermenge jol tartqan «Aıka» fılmi kópshilik pen kınogerler tarapynan joǵary baǵalanyp kele jatqanyna qýanyshtymyn. Rasynda bul týyndy keıipkeri ómirdegi kúrdeli sátter arqyly bizge oı salyp, jigerlendiredi. Talaıly taǵdyr ıesiniń jaǵdaıy kórgen jandy tolǵandyrady. Jan dúnıesin bir ysytyp, bir sýytyp, áleýmettik máselelerdiń ózektiligin júrekke jetkizedi.
Kıno áleminde keńinen tanylǵan Kann kınofestıvalinen keıin osy «Nıka» júldesindegi «Úzdik áıel róli» nomınatsııasyndaǵy jeńis Sizdiń budan da bıik belesterge bastaı berýine tilektespin. Laıym talǵampaz kórermendi nemquraıdy, jaıbaraqat qaldyrmaıtyn fılmderińiz ben obrazdaryńyzdyń qatary arta bersin! Sizderge zor densaýlyq, tolaıym tabys pen shyǵarmashylyq shabyt tileımin!» - dep, mınıstr «Nıka» júldesin tabystady.
Sonymen qatar, mınıstr Aqtoty Rahmetollaqyzy teatrdyń jetekshi aktrısasy Samal Eslıamova men birge «Aıka» jáne «Tıýlpan» fılmin ǵana emes, barsha qazaq ónerin Samaldyń jeńisi de álemge tanylýyna sebepker bolǵan rejısserdiń de úlken jumysy ekenin atap ótip, onyń rejısserlik eńbegine odan da joǵary shyǵarmashylyq tabystar tilep, reseılik rejısser Sergeı Dvortsevoıdy «Mədenıet salasynyń úzdigi» tósbelgisimen marapattady.
Al «Abaı-Toǵjan» mýzykalyq dramasyn tamashalaǵan teatrdyń qurmetti qonaǵy Qazaqstannyń eńbek sińirgen ártisi, memleket jáne qoǵam qaıratkeri Nurlan Ónerbaev:
- «1998 jyly Elordamyz Astana attanyp jatqan kezde «Elorda - jaqyn bolashaqta mádenıet ortalyǵy bolady» dep Elbasymyz aıtqanda, ol týraly oılaýdyń ózi bulyńǵyr bolatyn! Osyndaı talantty jastardyń basyn qosyp jáne olardyń arasynda qazaq ónerin búkil álemge tanytyp júrgen juldyzdardyń bolýy, kóshtiń túzý júrip kele jatqanyn bildiredi! Osy tusta Ashat Maksımulyna sheksiz alǵysymdy bildirgim keledi!» - dedi.
Nur-Sultan qalasy mádenıet basqarmasynyń basshysy Nurlan Álimjanov mınıstr Aqtoty Raıymqulovaǵa altyn ýaqytyn bólip kelgenine alǵys aıtyp, jas teatrǵa kelip izgi nıetin bildirip, jas artısterge aq batasyn berip, qoldaǵany úshin rahmetin jetkizip, óziniń de jas artısterdiń ónerine tánti bolǵanyn bylaı jetkizdi:
- «Jas ta bolsa, kózderinde oty bar, jany bar, keremetteı qany bar ónerli baýyrlarymyzdyń, qaryndastarymyzdyń basyn qosyp ashyp jatqan teatrdyń dırektory, elimizge tanymal teatr rejısseri Ashat Maksımulyna alǵysymdy bildiremin. Tiri daýys, dombyra, qyl qobyz, úrmeli aspaptardyń tiri únderin tek qana tiri dúnıeni bizge kórsetip jatqan jalyndy jastarymyzdyń bary bizdi qýantady!» - dep, basqarma basshysy Nurlan Baıanǵalıuly óziniń shyn qýanyshymen bólisti.
Shara sońynda Mýzykalyq jas kórermen teatrynyń dırektory, Ashat Maemırov qazaqstandyqtardy alda kele jatqan 7 mamyr - Otan qorǵaýshylar kúnimen, 9 mamyr -Jeńis kúnimen quttyqtap, kelgen qonaqtarǵa alǵys bildirdi.
Sondaı-aq, Qazaqstannyń eńbek ártisi Baǵdat Sámedınova, Qazaqstannyń eńbek sińirgen qaıratkerleri Svetlana Aıtbaeva men Dına Hamzına keshtiń qonaqtary boldy.