Salyqtyń mindetti medıtsınalyq saqtandyrý júıesinen aıyrmashylyǵy bar - Birtanov
Aıta keterligi, pikirtalasta mınıstrge qarsylas bolǵan «Talap» qoldanbaly zertteýler ortalyǵynyń dırektory Rahym Oshaqbaev túrli dálelder arqyly mindetti medıtsınalyq saqtandyrýdyń salyqtyń jańa túrleriniń paıda bolýyna jol ashatyndyǵyn ashyq aıtqan bolatyn.
«Saqtandyrýdyń salyqtan qandaı aıyrmashylyǵy bar ekendigin Rahym jaqsy biledi dep oılaımyn. Biz medıtsınalyq saqtandyrý júıemizdi medıtsınalyq saqtandyrýdyń halyqaralyq standarttaryna tolyqtaı sáıkestendirip jasadyq. Jetekshi sarapshylardy da tarttyq. Bul jumystarǵa jetekshi ekonımıster de tartyldy. Másele salyq nemese saqtandyrý jarnamasy tóńireginde emes», - dedi mınıstr.
Osy rette ol búgingi tańda qarapaıym qazaqstandyqtary qoldanystaǵy júıe aıasynda qandaı qyzmetterdi tegin ala alatyndyǵy tolǵandyratyndyǵyn atap ótti.
«Biz qazirgi ýaqytta salyq tóleıtindigimizdi jáne bıýdjettiń múmkinshilikteri múldem jetkiliksiz ekendigin aıtyp otyrmyz. Másele óte qarapaıym ǵana, men salalyq mamanǵa qarala almaımyn, ota jasatýdy birneshe aı kútýime týra keledi. Sondyqtan da másele oǵan úlken qarjynyń qajettigi tóńireginde bolyp otyr», - dedi Birtanov.
Sonymen qatar ol mindetti medıtsınalyq saqtandyrý máselerine baılanysty qoǵam arasynda týyndaıtyn máselelerdi jiti baqylap otyrǵandyǵyn jáne oǵan taıaý aralyqta jaýap berýge daıyn ekendigin basa aıtty.
«Densaýlyq saqtaý salasyna qatysty saýaldardyń kóptigin eskere kele men taıaý aralyqta ınternet konferentsııa ótkizýdi usynamyn. Tikeleı efırde medıtsınalyq saqtandyrýdan basqa da suraqtarǵa jaýap berýge daıynmyn», - dedi Birtanov.