Salyqtyq raqymshylyq jyl sońyna deıin durys aıaqtalýy tıis - Dosaev

ASTANA. QazAqparat - Salyqtyq raqymshylyq jyl sońyna deıin durys aıaqtalýy tıis. Búgin QR Qarjy mınıstrliginiń keńeıtilgen alqa májilisinde Premer-Mınıstrdiń orynbasary Erbolat Dosaev vedomstvoǵa osyndaı mindet júktedi, dep habarlaıdy QazAqparat tilshisi.

«Eń basty problema - bul aqparattandyrý. Qarjy mınıstrliginiń memlekettik kirister komıteti men ózge de aýmaqtyq bólimsheleri zańdy nemese jeke tulǵa ekendigine qaramastan árbir salyq tóleýshige olarǵa qatysy bar sharalardy jetkizip, ne isteý kerektigin túsindirýi tıis. Sizderge sáıkes ótinishtiń bireýlerden túsýin kútýdiń qajeti joq. Árbir salyq tóleýshige deıin habarlasyńyzdar. Olar sizderdiń aqparattyq júıelerińizde bar. Eger habarlama jiberý qajet bolsa, onda ony da jasańyzdar, fıdbek alyńyzdar. Bul aıtarlyqtaı úlken jumys emes. Biraq, barynsha qamtý bolýy tıis. Jumys jyldyń sońyna deıin durys aıaqtalýy qajet», - dedi vıtse-premer.

Al Qarjy mınıstri Álıhan Smaıylovtyń aıtýynsha, 2019 jyldyń 1 qańtarynda bastalǵan salyqtyq raqymshylyq shaǵyn jáne orta bıznestiń 90 myń salyq tóleýshisi iligedi. Búginde olardyń ishinde 28,5 myń sýbekti 6 mlrd teńge salyqtaryn tólep, 1,3 mlrd teńge ósimpul pen aıyppuldarynan qutylǵan.

Sondaı-aq elimizde 1,3 mln azamattyq salyq qaryzy bar. 2019 jyldyń 1 qańtaryndaǵy derekterge sáıkes turǵyndardyń qaryz kólemi shamamen 17 mlrd teńgeni quraıdy. Al onyń 5 mlrd teńgesi ósimpul bolyp otyr.