Salyqtyq raqymshylyq: Túrkistan oblysynyń turǵyndary 1 mlrd. teńgege jýyq qaryzyn ótedi
Baspasóz qyzmetiniń málimetterine qaraǵanda, bıylǵy jyldyń 4 jeltoqsanyndaǵy jaǵdaı boıynsha 600 myńnan astam qazaqstandyq salyq raqymshylyǵy múmkindikterin paıdalandy. Olar salyq boıynsha 8,5 mlrd teńge qaryzyn tóledi, al 1 mlrd teńgege jýyq ósimpul esepten shyǵaryldy.
Salyq raqymshylyǵyn paıdalanǵan azamattar arasynda Túrkistan oblysy kósh bastap tur. Oblysta 118 839 boryshkerdiń 77 215-si (65,5%) 995 mıllıon teńge tólep, negizgi qaryzdy tólegen. Óńirde esepten shyǵarylǵan ósimpul mólsheri 87,6 mln teńgeni qurady.
Qyzylorda oblysynda 15 791 boryshkerdiń 11 180 jeke tulǵasy (70,8%) 225 mln. teńge kóleminde qaryzyn ótegen, ósimpul 40,4 mln. teńge kóleminde esepten shyǵarylǵan.
Esterińizge sala keteıik, ósimpuldardy esepten shyǵarý aktsııasy bastalǵan kezde 1,5 mln. jeke tulǵa boıynsha jalpy qaryz 24,6 mlrd teńgeni qurady, onyń ishinde negizgi qaryz somasy 20,3 mlrd teńge, ósimpul 4,3 mlrd. teńge boldy.
MKK jyl sońyna deıin salyqtar boıynsha negizgi qaryzdy tólegen jaǵdaıda ósimpuldy esepten shyǵarý boıynsha raqymshylyq qoldanylatynyn eske salady. Salyqtyq raqymshylyq júrgizý merzimi - 2020 jylǵy 31 jeltoqsany.
Ósimpuldy esepten shyǵarý úshin eshqaıda barýdyń qajeti joq. Qaryzdyń negizgi somasyn tóleý jetkilikti. Ósimpul avtomatty túrde esepten shyǵarylady. Memlekettik kirister organdarynyń barlyq aýmaqtyq bólimshelerinde ósimpuldardy esepten shyǵarý jónindegi komıssııalar quryldy.
«Salyqtar boıynsha bereshektiń bar/joq ekendigi týraly málimetterdi QR QM Memlekettik kirister komıtetiniń saıtynan, sondaı-aq eSalyq mobile (AppStore, PlayMarket) mobıldi qosymshasy arqyly tekserýge bolady»,-delingen habarlamada.