Salyqtyq raqymshylyq: 31,3 myń qazaqstandyqtyń ósimpuly keshirildi

NUR-SULTAN. QazAqparat - Qazaqstandyqtardyń ártúrli salyq boıynsha 64 mln teńgeden astam ósimpuly esepten shyǵaryldy, dep habarlaıdy QazAqparat tilshisi Memlekettik kirister komıtetine silteme jasap.

7 qyrkúıektegi jaǵdaı boıynsha, salyqtyq raqymshylyq múmkindikterin 31 338 azamat paıdalanyp úlgergen. Olar 295,3 mln teńge salyq tólep, 64,1 mln teńge ósimpul esepten shyǵaryldy.

«Al, tólengen bereshek somasy boıynsha Almaty qalasy birinshi orynda. Ońtústik megapolıs turǵyndary 75,6 mln teńge salyq tóledi. Bul kórsetkish boıynsha alǵash úshtikte Túrkistan oblysy (35,1 mln.) jáne Almaty oblysy (34,2 mln.) bar.

Esepten shyǵarylǵan ósimpul kórsetkishinde Almaty qalasy – alda. Qala boıynsha bul soma 18,4 mln teńgege jetken. Joıylǵan ósipul kólemi 17,7 mln teńgeni qurap otyrǵan Nur-Sultan qalasy – ekinshi orynda. Al Mańǵystaý oblysynda 4,5 mln teńge ósimpul esepten shyǵarylǵan», - delingen komıtet habarlamasynda.

Sonymen qatar Qostanaı oblysynyń turǵyny kólik salyǵy boıynsha 1,4 mln teńge kóleminde negizgi bereshek somasyn ótep, onyń 1,07 mln teńge kólemindegi ósimpuly esepten shyǵaryldy.

Sol sekildi múlik salyǵy boıynsha jınaqtalǵan 1,2 mln teńge bereshekti Almaty qalasynyń turǵyny ótegen. Esepten shyǵarylǵan ósimpul – 429 myń teńge.

Aqtóbe oblysynda jer salyǵy boıynsha bereshegi bar azamat 51 myń teńge salyq tólep, 43 myń teńge ósimpuldan bosatyldy.

Aıta keteıik Salyqtyq raqymshylyq jasaý merzimi – 2020 jylǵy 31 jeltoqsanǵa deıin. Ósimpuldy esepten shyǵarý úshin eshqaıda barýdyń qajeti joq. Boryshtyń negizgi somasyn tóleý jetkilikti. Ósimpul avtomatty túrde esepten shyǵarylady. Salyqtyq beresheginiń bar-joǵy ekendigi týraly málimetti QR QM Memlekettik kirister komıtetiniń saıtynan nemese «eSalyq mobile» (AppStore, PlayMarket) mobıldik qosymshasy arqyly tekserýge bolady.