Salyqtyq raqymshylyq: 1 toqsanda salyq tóleýshilerdiń 1 mlrd teńge ósimpuly keshirildi

NUR-SULTAN. QazAqparat - Salyqtyq raqymshylyq sharasynyń birinshi toqsandaǵy nátıjeleri boıynsha salyq tóleýshilerge 1 mlrd teńge ósimpuly keshirildi. Bul týraly Qazaqstan Respýblıkasy Qarjy mınıstrliginiń Memlekettik kirister komıteti habarlady.

Komıtet taratqan málimetterge qaraǵanda, elimizde júrgizilip jatqan salyqtyq amnıstııa aıasynda salyqtan 138,3 mln. teńge negizgi qaryzyn tólegen Aqtóbe oblysynyń kásipornyna 330,4 mln. teńge ósimpul esepten shyǵaryldy.

Al Pavlodar oblysynyń salyqtar boıynsha 1,3 myń teńge bereshegin tólegen jeke kásipkerine 173,4 myń teńge ósimpul keshirildi.

Jalpy, respýblıka boıynsha 2019 jyldyń 5 sáýirine 34 699 salyq tóleýshi bıýdjetke 2018 jyldyń 1 qazanynda bolǵan jalpy somasy 7,7 mlrd. teńgeni quraıtyn negizgi qaryzyn tólegen.

Bul salyq tóleýshiler boıynsha 2 mlrd. teńge ósimpul jáne 230,0 mln. teńge aıyppul esepten shyǵarylatyn bolady.

Búgingi kúni 11 953 salyq tóleýshi boıynsha 1 mlrd. teńge somasynda ósimpuldar, jeti salyq tóleýshi boıynsha 582,4 myń teńge somasynda aıyppul esepten shyǵaryldy.

2019 jyldyń 1 qańtarynan bastap shaǵyn jáne orta bıznes sýbektileri úshin salyqtyq raqymshylyqty júrgizýdi qarastyratyn Zań kúshine engeni belgili. Al 2019 jyldyń 8 aqpanynan bastap bereshegin tólegen jaǵdaıda ósimpul men aıyppul somasyn esepten shyǵarý qaǵıdalary qoldanysqa engen bolatyn.

«Aldyn-ala derekter boıynsha 2018 jylǵy 1 qazandaǵy jaǵdaıǵa sáıkes 340,6 mlrd. teńge salyq bereshegi bar 90 077 shaǵyn jáne orta bıznes sýbektileri (31 210 zańdy tulǵalar jáne 58 867 dara kásipkerler) raqymshylyqqa jatatynyn esterińizge salamyz»,-delingen habarlamada.

Bul rette, shaǵyn jáne orta bıznes sýbektileriniń memlekettik kirister organdaryna barýdyń qajeti joq: ósimpuldar men aıyppuldar salyq tóleýshiniń ótinishinsiz esepten shyǵarylady. Ońaltý rásimindegi jáne salyqtar boıynsha tóleý merzimin uzartqan salyq tóleýshilerge qatysty rahymshylyq qoldanýdyń tártibi basqasha.

Sondaı-aq, qazirgi ýaqytta negizgi qaryzyn tólegen jaǵdaıda eesptelgen ósimpuldy esepten shyǵarý jolymen jeke tulǵalar úshin salyq raqymshylyǵyn ótkizý boıynsha Memleket basshysynyń tapsyrmasyn oryndaý maqsatynda, memlekettik kirister organdarymen ázirlengen QR zańnamalyq aktilerine túzetýler, múddeli memlekettik organdarymen kelisilip, QR Úkimetiniń qaraýyna engizildi.