Salyqtyq ákimshilendirý tolyǵymen táýekelderdi basqarý júıesine negizdelýi kerek - Smaıylov

ASTANA. QazAqparat – Salyqtyq ákimshilendirý tolyǵymen táýekelderdi basqarý júıesine negizdelýi kerek. Bul týraly búgin Úkimet otyrysynda Premer-Mınıstr Álıhan Smaıylov aıtty, dep habarlaıdy QazAqparat tilshisi.

«Bıyl jańa Salyq kodeksi daıyndalady. Ol salyq zańnamasyn jeńildetip, óndiris kólemi men ınvestıtsııalardy ulǵaıtýǵa, ınnovatsııalardy engizýge, jumyspen qamtýǵa yntalandyrýy tıis. Salyqtyq ákimshilendirý tolyǵymen táýekelderdi basqarý júıesine negizdelýi kerek. Bul máselede memlekettik organdar «Atameken» palatasymen jáne sarapshylarmen birge tyǵyz ózara is-qımyl jasaýy qajet», - dedi Álıhan Smaıylov.

Premer-Mınıstr taǵy bir mańyzdy mindet – jańa Bıýdjet kodeksin ázirleý ekendine toqtaldy.

«Biz bıyl qarjylyq tártipti kúsheıtip, bıýdjet júıesiniń ashyqtyǵyn keńeıtýge tıispiz. Sonymen qatar, memlekettik shyǵystardyń tıimdiligin arttyrý kerek. Bıýdjetteý tásilderin jetildirý aıasynda ortalyq jáne jergilikti atqarýshy organdardyń birinshi basshylarynyń jedel ári derbes áreket etýin qamtamasyz etý qajet», - dedi Premer-Mınıstr.