Salyqty ákimshilendirý baǵytynda keshendi sharalar qabyldanady

NUR-SULTAN. QazAqparat - Qosylǵan qun salyǵyn ákimshilendirýde Blockchain-tehnologııasyn engizý josparlanyp otyr. Bul týraly Úkimet otyrysynda QR Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Memleket basshysynyń tapsyrmasyna sáıkes Eńbek jáne halyqty áleýmettik qorǵaý mınıstrligimen ashylǵan jumys oryndary jáne jumysqa ornalastyrylǵan azamattar týraly málimetterdi elektrondyq túrde qabyldaý qamtamasyz etiledi. Jaqynda bıýdjetten, onyń ishinde Jumyspen qamtý jol kartasy aıasynda qarjylandyrylǵan memlekettik baǵdarlamalardyń qatysýshylaryn qashyqtyqtan baqylaý jáne taldaý kúsheıtiledi», - dedi ol.

Mınıstrdiń aıtýynsha, salyqty ákimshilendirýdi ońtaılandyrý jáne jeńildetý boıynsha keshendi sharalar qabyldanýda. Olar taýarlardy baqylaý júıesin, taýarlarǵa ilespe júkqujattar men elektrondyq plombalardy engizýdi qamtıdy. Bul kontragentter arasyndaǵy iske asyrýdyń ashyqtyǵyn qamtamasyz etedi.

«Budan basqa, qosylǵan qun salyǵyn ákimshilendirýde Blockchain-tehnologııasyn engizý josparlanýda. Bul salyq tóleýden jaltarý táýekelin aıtarlyqtaı tómendetedi jáne qolma-qol aqsha alý jónindegi mámilelerdi qysqartady», - dedi Erulan Jamaýbaev.