Salyqshylar elıtaly baspanalardy jalǵa beretinderge qarsy reıd bastady

ALMATY. QazAqparat - Almatyda «Evropolıs» elıtalyq turǵyn úı kesheninde 11 páter ıesi baspanalaryn zańsyz jalǵa berip kelgen, dep habarlaıdy QazAqparat tilshisi.

Medeý aýdandyq Memlekettik kirister basqarmasy men qalalyq Kóshi-qon polıtsııasynyń qyzmetkerleri salyq tóleýden jaltarǵan elıtalyq turǵyn úılerdegi páter ıelerin anyqtaýdy qolǵa aldy.

Reıd barysynda bir ǵana «Evropolıs» turǵyn úı kesheninde 11 baspana zańsyz jalǵa berilip otyrǵany anyqtaldy. Negizinen páterlerdi shetel azamattary jalǵa alyp kelgen.  

«Bul turǵyn úıde bir aıdaǵy jalǵa alý somasy eki bólmeli páter úshin -  250-550 myń, úsh bólmeli - 400-800 myń, tórt bólmeli - 550 myńnan 1 mln teńge deıin, bes bólmeli páterler 1 mln 300 myń teńgeden bastalady. Páter qojaıyndary jeke kásipker retinde esepte turmaǵandyqtan, memleketke salyq tólemegen. Olarǵa 1 apta merzim berildi. Osy ýaqytta páter ıeleri salyq organdaryna esepke turyp, tabys kólemi týraly esep berýge mindetteledi», - dedi baspasóz qyzmetinen.

Bulaı bolmaǵan jaǵdaıda salyq tólemderi aıyppul sanktsııalarymen óndiriledi.

Aıta ketý kerek, salyq tólenetin tabys kózi zań oryndarynan jasyrylǵan jaǵdaıda Qazaqstan zańnamasy boıynsha ákimshilik nemese qylmystyq jaýapkershilikke tartý qarastyrylǵan. Páter ıeleri HQKO baryp, jeke kýálikpen tegin tirkele alady.  

Jalǵa beriletin páterden tólenetin salyq barlyq tabystyń 1 paıyzyn ǵana quraıdy.

Aýdandyq Memlekettik kirister departamentiniń qyzmetkerleri shilde aıynyń sońyna deıin elıtalyq turǵyn úılerdiń barlyǵyn aralap shyqpaq.