Salyq Zımanov zań ǵylymdary doktory dárejesin alǵan alǵashqy qazaq - Eraly Toǵjanov
«Men Salyq Zımanovtyń tikeleı shákirtimin. Onyń qol astynda qyzmet istedim. Qazaqta «ákeniń balasy emes, halyqtyń balasy bol» degen aq tilek bar. Salyq Zımanovtyń ómir joly osy tilektiń naqty dáleli. 1921 jyly ómirge kelip, halqy men týǵan jeriniń basyna túsken barlyq qıynshylyqty óz basynan ótkizgen qazaqtyń birtýar uly mektepte asa uqyptylyqpen oqyp, eńbek jolyn muǵalim bolýdan bastaǵan. Soǵysta halqy men Otany úshin aıanbaı erlik kórsetip, gvardııa polkovnıgi shenin alǵan. Beıbit ómirge oralǵan jas jigittiń jolynda Qanysh Sátbaev sııaqty uly ǵalym kezdesip, 1948 jyldan bastap ǵylym jolyna aıaq basqan», - deıdi QR Premer-mınıstriniń orynbasary Eraly Toǵjanov.
Onyń aıtýynsha, Salyq Zımanov 29 jasynda Máskeýde KSRO ǵylym akademııasynyń Quqyq ınstıtýtynda zań ǵylymdary kandıdaty dárejesin, 40 jasynda zań ǵylymdarynyń doktory ǵylymı dárejesin qorǵaǵan.
«Ol ultymyzdyń tarıhynda «Zań ǵylymdarynyń doktory» dárejesin ıelengen alǵashqy qazaq desem – artyq aıtqandyq emes. Ol 46 jasynda Qazaqstan Respýblıkasynyń ǵylym akademııasynyń akademıgi ataǵyn ıelengen. Mundaı ataqqa ıe bolý ony ǵylymı ortada moıyndalý ǵana emes, jalpy qazaq jastaryn ǵylymı baǵytqa, onyń ishinde zań ǵylymy ortasyna alyp kirýine yqpal etti. Osy baǵytta ulttyq ǵylymı ortany qalyptastyrdy. Akademık ónegeli ómirinde 200-ge jýyq ǵylymı eńbek jazyp, zań ǵylymdarynyń negizin qalap, órkendeýine súbeli úles qosqan», - deıdi ol.
Ol Salyq Zımanov qazaqtyń bıler sotynyń teńdesi joq ınstıtýt ekenin dáleldegen ǵalym ekenin aıtty.
«Ol bıler sotyna arnalǵan eńbekterinde «qazaqtyń bı, qazylary eshkimge táýeldi bolmaǵan, olardy eshkim saılamaǵan, tórelik aıtatyn adamdy daýlasýshylardyń ózderi tańdap, onyń ádil sheshimine júgingen. Sondyqtan bıler óz abyroı-bedeli úshin eshkimge qııanat jasamaı, shyndyqtyń jarshysy bolǵan» degen baılamdy tujyrymda qazaqtyń bıler soty ınstıtýtynyń búgingi sot júıesine úlgi eterlik tustary kóp ekendigin eskertken. Egemendi el bolyp, táýelsiz tarıhymyzdy endi bastaǵan shaǵymyzda ol «Qazaqstan ishki uıymdastyrylýy boıynsha kúshti memleketke aınalýy úshin ondaǵan jyldar qajet. Al Prezıdenttik bılikti kúsheıtý – kúttirmeıtin jaǵdaı» degen. Onyń oılary óz ómirsheńdigin búgin dáleldedi. Salyq Zımanov óz ómirin eliniń damýyna arnaǵan azamat. Salyq Zımanulynyń bilim jáne ǵylym salasyn basqarý men damytýǵa qosqan úlesi mol. Qazaq memlekettik ýnıersıtetiniń zań fakýlteti, Ulttyq ǵylym akademııasynyń fılısofııa jáne quqyqtyq ınstıtýttaryn basqaryp, myńdaǵan shákirt tárbıelep, otyzdan asa ǵylym doktory men kandıdatyn daıyndady. Salyq Zımanulynyń jetekshiligimen 1999 jyly KSRO men Reseı Federatsııasy Eýropa memleketteriniń tájirıbesin eskergen HHІ ǵasyr zańgerin daıyndaý úlgisin jasady», - deıdi Eraly Toǵjanov.