Salyq tóleýdi keıinge qaldyrǵanda azamattyń jalǵyz baspanasy kepilge alynbaıdy
«Salyq zańnamasyna sáıkes salyq tóleý merzimin keıinge qaldyrǵanda nemese bólip tóleýge múmkindik alý úshin ótinim bergende salyq tóleýshi kepilge múlikti (bólip tóleýge berilgen merzimge baılanysty: jyljymaıtyn múlik, avtokólik, qurylǵylar jáne t.b.) qoıýy kerek. «Salyq jáne bıýdjetke tólenetin basqa da mindetti tólemder týraly» (Salyq kodeksi) Qazaqstan Respýblıkasy Kodeksiniń 52-babynyń 2) tarmaqshasy erejelermen tolyqtyrylyp, endi jeke tulǵanyń, dara kásipkerdiń, jeke praktıkamen aınalysatyn adamnyń jalǵyz turǵyn úıi kepil nysanasy bola almaıdy. Atalǵan ózgertýler 2022 jyldyń 1 naýryzynan bastap qoldanysqa enedi», - delingen vedomstvo aqparattynda.
Komıtet málimetinshe, osy túzetýlerdi iske asyrý maqsatynda QR Qarjy mınıstrligi «Qazaqstan Respýblıkasynyń memlekettik kirister organdarynyń memlekettik qyzmetter kórsetý qaǵıdalaryn bekitý týraly» QR Qarjy mınıstriniń mindetin atqarýshysynyń 2020 jylǵy 10 shildedegi № 665 buıryǵyna ózgertý engizý týraly» QR Qarjy mınıstriniń buıryq jobasyn ázirledi.
Bul joba ashyq normatıvtik-quqyqtyq aktilerdiń ınternet-portalyna 2022 jyldyń 7 aqpanynda jarııalanǵan.
Jobany jarııa talqylaýdy ótkizý merzimi – 2022 jyldyń 21 aqpanyna deıin.