Salyq tólemeı júrgen qazaqstandyqtardyń tizimi jarııalandy

NUR-SULTAN. QazAqparat - Jer, kólik jáne múlik salyǵy boıynsha jınaqtalǵan 250 mln teńgeden asatyn qaryzy bar 100 qazaqstandyqtyń tizimi jarııalandy. QR Qarjy mınıstrligi Memlekettik kirister komıtetiniń málimeti boıynsha tizimdegi tulǵalardyń ósimpuldy esepten shyǵarýǵa múmkindigi bar, dep habarlaıdy QazAqparat tilshisi.

Olardyń salyq boıynsha jalpy qaryzy qazirgi ýaqytta 263 845 620 teńgeni qurap otyr. Bul somanyń ishindegi negizgi qaryz úlesi – 166 150 674 teńge. 97 694 946 teńge – eseptelgen ósimpuldar.

Antıreıtıng tiziminiń birinshi ornynda Almaty qalasynyń turǵyny. Onyń tóleýi tıis kólik salyǵynyń jalpy somasy 11 mln.teńgege (10 932 801 teńge) jýyq. Bul soma boıynsha negizgi qaryz – 6 314 141 teńge. Al, jınaqtalǵan ósimpul – 4 618 660 teńgeni qurap otyr.

Jer salyǵy boıynsha eń kóp borysh jınaqtaǵan azamat - Aqtóbe qalasynyń turǵyny. Ol jalpy somasy 723 455 teńge qaryzyn ótegen jaǵdaıda 73 719 teńge somasyndaǵy ósimpuldan bosatylýy múmkin.

Sonymen birge, qazaqstandyqtar múlik salyǵy boıynsha da qaryz jınap úlgergen. Salyqtyń bul túrinde reıtıngti Nur-Sultan qalasynyń turǵyny bastap otyr. Onyń jalpy qaryzy - 1 165 033 teńge. Ol negizgi qaryz somasyn tólegen jaǵdaıda 422 287 teńge ósimpuldy esepten shyǵara alady.

Boryshkerlerdiń tolyq tizimin MKK saıtynda nemese myna silteme boıynsha kórýge bolady.

Eske sala keteıik, salyqtyq raqymshylyq 2020 jylǵy 31 jeltoqsanǵa deıin jalǵasady.

Salyq boıynsha negizgi qaryzyn ótegen azamattardyń jınaqtalǵan ósimpuldary esepten shyǵarylady.

Ósimpuldy esepten shyǵarý úshin eshqaıda barýdyń qajeti joq.

Boryshtyń negizgi somasyn tóleý jetkilikti. Ósimpul avtomatty túrde esepten shyǵarylady.

Memlekettik kirister organdarynyń barlyq aýmaqtyq bólimshelerinde ósimpuldy esepten shyǵarý jónindegi komıssııalar quryldy.

Jeke tulǵalar boryshtyń negizgi somasyn tólegen jaǵdaıda ósimpuldy esepten shyǵarý jónindegi Ereje QR Qarjy mınıstriniń 2020 jylǵy 13 tamyzdaǵy №730 buıryǵymen bekitilgen.

Sondaı-aq, 2020 jyldyń 1 sáýirinen keıin ótken salyq kezeńderi úshin negizgi qaryz somasy men ósimpuldy tólegen azamattar qarajatty aýmaqtyq memlekettik kirister organdaryna ótinish berý arqyly qaıtaryp ala alady nemese bolashaq tólemder esebine qaldyrý múmkindigi qarastyrylǵan.

Salyqtyq beresheginiń bar-joǵy týraly málimetti QR QM Memlekettik kirister komıtetiniń saıtyndaǵy silteme arqyly nemese «eSalyq mobile» (AppStore, PlayMarket) mobıldi qosymshasy arqyly tekserýge bolady.

Memlekettik kirister komıteti aldaǵy ýaqytta da jaýapsyz salyq tóleýshiler tizimin jarııalaýdy jalǵastyratyn bolady.