Salyq tólemegen júrgizýshiden Geländewagen kóligi tárkilenip alyndy

ALMATY. QazAqparat - Almatyda salyq organdary kólik salyǵyn tólemegen júrgizýshiden Mercedes-Benz Geländewagen kóligin tartyp aldy, dep habarlaıdy QazAqparat tilshisi.

Qalalyq Memlekettik kirister departamenti Polıtsııa departamentimen, aımaqtyq jeke sot oryndaýshylary palatasymen birige otyryp «Jańa jylǵa - beresheksiz» aktsııasyn ótkizip jatyr.

Júrgizilgen reıd jumystarynyń nátıjesinde Almaty-Talǵar tasjolynda polıtsııa Mercedes-Benz G-klass, ıaǵnı Geländewagen kóligin toqtatqan.

Tekserý nátıjesinde júrgizýshiniń tólenbegen 725 myń teńge kólik salyǵy qordalanyp qalǵany anyqtaldy.

Sondyqtan, bul kólikti polıtsııa qyzmetkerleri tárkilep, aıyp turaǵyna jiberdi. Kólik ıesi salyq bereshegin jaqyn arada tólep qutylýǵa mindetteldi.

Qalalyq Memlekettik kirister departamenti turǵyndarǵa salyq bereshegin merziminde tólep turýdy eskertti.

Salyq tóleýshiler salyqtyq beresheginiń bar-joǵyn myna saıt arqyly bile alady.

«Búginde jer, múlik, kólik salyǵy boıynsha Almatyda 156 761 jeke tulǵanyń 4,3 mlrd teńge salyq bereshegi bar. Bul bereshektiń 84,8 %-y kólik salyǵy bolyp otyr»,- dedi Memlekettik kirister departamentinen.