Salyq saıasatyn tıimdi ári saýatty júrgizý - ýaqyt talaby

ASTANA. QazAqparat - Salyq saıasatynyń tıimdi jáne saýatty júrgizilýi bıýdjettiń kirisin arttyryp qana qoımaıdy, ol kásipkerlik belsendilikke, ınvestıtsııalyq klımattyń jaqsarýyna, tutastaı alǵanda, el ekonomıkasynyń ornyqty jumys isteýine tikeleı áser etedi. Osy deńgeıge shyǵý maqsatyndaǵy ózekti máseleler «100 naqty qadam» Ult josparynyń aıasynda sheshimin tabatyn bolady.

Memleket basshysy aıqyndaǵan «100 naqty qadam» Ult josparynda salyq rejimderi men rásimderin ońtaılandyrý, kirister men shyǵystardy jappaı salyqtyq deklaratsııalaý, táýekelderdi basqarý júıelerin engizý, keden jáne salyq júıelerin ıntegratsııalaý sekildi sharalar kózdelgen. Memlekettiń salyq júıesi ulttyq ekonomıkanyń talaptaryna jáne qazirgi zamanǵy jahandyq syn-qaterlerge tótep berýi tıis, olardyń qatarynda elimizdiń kirisin tómendetip otyrǵan munaı baǵasynyń arzandaýy; ekonomıkalyq ósimniń baıaýlaýy; ulttyq valıýta baǵamynyń tómendeýi; Reseıge qarsy engizilgen sanktsııalardyń yqpaly da bar.

Osy turǵyda Senat tóraǵasy Parlament Senatynyń tóraǵasy Qasym-Jomart Toqaev salyq júıesi bıýdjetti teńgerimdeýmen qatar, ekonomıkanyń qurylymdyq ózgeristeri men ınnovatsııalyq damýyn qamtamasyz etýge, joǵary tehnologııalyq óndiristi qurýǵa jáne shıkizattyq emes eksport pen óńdelgen ónimniń ósimin yntalandyrýǵa baǵyttalýy tıis dep sanaıdy. «Bizdiń basty maqsatymyz - memlekettiń jáne salyq tóleýshilerdiń múddelerin úılestire otyryp, tıimdi jáne boljamdy salyq júıesin qurý», - dedi joǵarǵy palatanyń basshysy. Búgingi qazaqstandyq salyq zańnamasy kóptegen eldermen salystyrǵanda meılinshe yryqtandyrylǵan jáne Eýrazııalyq ekonomıkalyq odaq elderi arasynda bıznes úshin eń tartymdy bolyp tabylady. Muny Dúnıejúzilik banktiń reıtıngisi de rastaı túsedi, onda Qazaqstan «salyq salý» ındıkatory boıynsha 17-orynda tur. Memleket basshysynyń bes ıns­tıtýttyq reformasyn iske asyrý aıasynda salyq salý júıesin jetildirýge baǵyttalǵan zań jobalary qajet delingen. Usynylǵan sharalar kóleń­keli ekonomıkany qysqartýǵa jáne salyqtyq ákimshilendirýlerdi jaqsartýǵa baǵyttalǵan. Bes ınstıtýtsıonaldyq reforma aıasyndaǵy «100 naqty qadam» Ult josparynyń 44 jáne 45-qadamdaryn júzege asyrý maqsatynda kelesi jyly salyq zańnamasyna ózgerister men tolyqtyrýlar engiziletin bolady. Bul rette zań jobasy negizinen janama salyqtardy ákimshilendirý jáne kóleńkeli ekonomıkany tómendetý sharalaryn qamtymaq. Bul týraly Ulttyq Ekonomıka mınıstri E.Dosaev: «44-qadamdy júzege asyrý aıasynda janama salyq salý tetikterin ózgertetin norma qarastyrylady, sonyń ishinde qosylǵan qun salyǵyn satý salyǵyna aýystyrý tetikteri qaralady. Budan bólek, táýekelderdi basqarý júıesiniń engizilýine baılanysty, memlekettik kiris organdarynyń jańadan engizip jatqan elektrondyq túbirtekter berýin ýaqytsha toqtatý múmkindigi qarastyrylýy yqtımal. Sondaı-aq, memlekettik kiris organdaryna málimetterdi onlaın rejımmen beretin termınaldar men kassalyq apparattardy engizý kózdeledi. Qolma-qol aqsha aınalymyn tómendetý maqsatynda kartochkamen esep aıyrysýlarǵa komıssııa tómendetilip, tólem termınaldaryna jeńildikti lızıngter qaralýy yqtımal», - deıdi. Onyń aıtýyna qaraǵanda, qosylǵan qun salyǵy boıynsha qoldanystaǵy jeńildikter aıtarlyqtaı qysqarady. Al satýǵa salynatyn salyqtardy engizý múmkindigine qatysty máselelerdi qarastyrý úshin 2015 jyldyń 1 qarashasynan arnaıy jumys toby qurylatyn bolady. «Ult josparynyń 45-qadamy aıasynda zań jobasymen shyǵystar men kiristerdiń mindetti salyqtyq eseptiligin qamtı otyryp, qoldanystaǵy salyq rejımin ońtaılandyrý kózdeledi. Al býhgalterlik esep júrgizý men eseptilikti tapsyrý boıynsha qyzmetter kórsetýdi ulttyq kásipkerler palatasy men Kásipkerlerdi qoldaý ortalyǵynyń bazasynda júzege asyrý usynylady. Budan bólek, úsh deńgeıli salyqtyq rejımdi 2017 jyldyń qańtarynan engizý josparlanyp otyr. Munyń birinshisi jeke kásipkerler úshin patent, ekinshisi kirister men shyǵystardyń salyqtyq eseptiligin júrgizetin shaǵyn jáne orta bıznes úshin arnaıy salyq rejımi. Úshinshisi - naryqtyń barlyq sýbektilerine arnalǵan jalpy rejım», - dedi E. Dosaev. Qazirgi kezde «100 naqty qadam» Ult josparyn iske asyrý úshin bıznesti júrgizýge qolaıly jaǵdaı jasaý maqsatynda salyqtyq ákimshiliktendirýdi jetildirý jáne aldyn alý-baqylaý sharalaryn ońtaılandyrý qajettigi týyndap otyr.