Salyq saıasaty úkimetke de, bızneske de túsinikti bolǵany kerek - Toqaev

NUR-SULTAN. QazAqparat – QR Prezıdenti Qasym-Jomart Toqaev elge jańa salyq saıasaty kerektigin aıtty, dep habarlaıdy QazAqparat tilshisi.

«Bizge jańa salyq saıasaty qajet. Ol saıasat astyrtyn qıturqy áreketterge jol bermeıtin, bızneske de, Úkimetke de ashyq, túsinikti bolýy kerek. Úkimetke birshama kúrdeli mindet júktelip otyr. Ol mindetterdiń bárin kásipkerler qaýymymen talqylaý qajet. Salyqty adal tóleý tıimdi ári ońaı bolatyndaı etip isteý kerek. Bızneske, ásirese iri bızneske jumysy kómeski, kúdikti seriktesterge tózbeýshilik qaǵıdatyn ustaný kerek», - dedi Memleket basshysy Qazaqstannyń iri bıznes ókilderimen kezdesýinde.

Sondaı-aq, ol keden isin de jańa paraqtan bastaýdy usyndy.

«Memlekettiń moınynan kóleńkeli ekonomıkanyń úlesin qysqartý mindetin eshkim alǵan joq. Bul bıýdjet kirisiniń orasan kózi. Sonymen birge parasatty salyq tóleýshilerdi qoldap, olardy adal emes básekeden arashalaý mańyzdy», - dedi Qasym-Jomart Toqaev.