Salyq raqymshylyǵy: Jeńildikti bıznestiń qaı salasynyń ókilderi kóbirek paıdalandy

NUR-SULTAN. QazAqparat – QR Qarjy mınıstrliginiń birinshi vıtse-mınıstri Berik Sholpanqulov salyq raqymshylyǵyn kóbirek paıdalanǵan óńirlerdi atady, dep habarlaıdy QazAqparat tilshisi.

«Aımaqtardy alyp qaraıtyn bolsaq, salyqtyq raqymshylyqty kóbirek paıdalanǵan kásipkerler kelesi óńirlerde tirkelip otyr: Almaty qalasy (6 513 ShOB sýbektisi), Túrkistan oblysy (5 196 salyq tóleýshi), Almaty oblysy 5 054 (salyq tóleýshi), Nur-Sultan qalasy (3 729 salyq tóleýshi). Syzylyp tastalǵan ósimaqylar men aıyppuldyń iri mólsheri (1,1 mlrd teńge) Almaty qalasynda tirkeldi. Odan keıingi oryndarda Aqtóbe oblysy (1,0 mlrd teńge), Nur-Sultan qalasy (750,0 mln teńge), Qostanaı oblysy (413,0 mln teńge) tur», - dedi Berik Sholpanqulov OKQ-da ótken baspasóz máslıhatynda.

Vıtse-mınıstr sonymen birge ekonomıkalyq salalar boıynsha jeńildikti paıdalanǵan sanattardy atady.

«Ekonomıkalyq baǵyty boıynsha salyqtyq raqymshylyqty kóbirek paıdalanǵandardyń aldyńǵy qatarynda jappaı jáne bólshektik saýda salasynyń ókilderi tur. Osylaısha, jalpy tólengen salyqtar men bereshekterdiń 75 paıyzyn atalmysh sanattaǵy 33 130 salyq tóleýshi ótegen. Sonymen birge qyzmet kórsetý salasynda 3 327 salyq tóleýshi jalpy kórsetkishtiń 15 paıyzyn, aýyl sharýashylyǵy salasyndaǵy 2 209 kásipker 5 paıyzyn tólegen. Shaǵyn jáne orta bızneske arnalǵan salyqtyq raqymshylyqty qorytyndylaı otyryp, bul baǵyttaǵy jumys bıznesti jigerlendirgenin baıqaımyz», - deıdi ol.

Eske sala ketsek, elimizde salyq raqymshylyǵy bastalǵaly bul jeńildikti 44 397 salyq tóleýshi paıdalanǵan.