Salyq raqymshylyǵy: 4 mln teńge aıyppul esepten shyǵaryldy
«Memlekettik kirister organdary turaqty túrde salyq tólemeıtin jeke tulǵalardan salyq bereshegin óndirip alý boıynsha júıeli sharalar júrgizilip jatyr. Osyndaı sharalardyń biri - salyq tóleýden jaltarǵan salyq bereshegi bar kóp 100 jeke tulǵalar tiziminiń jarııalanýy. Bul tizimder Komıtettiń jáne memlekettik kiristerdiń aýmaqtyq departamentteriniń saıtynda únemi jarııalanyp turady», - dedi OKQ-da ótken baspasóz máslıhatynda QR Qarjy mınıstrligi Memlekettik kirister komıteti Salyq salý ádisnamasy departamenti dırektorynyń mindetin atqarýshy Dáýlet Jarylǵasynov.
Onyń aıtýynsha, mysaly, salyq tóleýden jaltarǵan bereshegi eń kóp 100 salyq tóleýshiniń tizimderiniń birin jarııalaǵannan keıin Nur-Sultan qalasynyń turǵyny 3 193 076 teńge kóleminde jer salyǵy boıynsha qaryzyn tólegen.
Sonymen qatar, jeke tulǵalarǵa salyqtyq raqymshylyq jasaý aıasynda 4 000 869 teńge mólsherinde eseptelgen aıyppul esepten shyǵarylǵan.
«Sondaı-aq, Qostanaı oblysynyń turǵyndarynyń biri tizim jarııalanǵannan keıin kólik salyǵy úshin 421 399 teńge kóleminde qaryzyn tóledi. Onyń 408 399 teńge kóleminde ósimpuly esepten shyǵaryldy», - dedi ol.
Eske sala ketsek, osydan eki aı buryn Memlekettik kirister komıteti salyq tóleýden jaltarǵan 100 jeke tulǵanyń tizimin jarııalaǵan bolatyn. Ol azamattardyń memleket aldyndaǵy jalpy boryshy 286 019 395 teńgeni quraǵan edi. Onyń 175 354 401 teńgesi – negizgi borysh somasy, al qalǵan 110 664 995 teńge – ósimpul bolǵan.