Salyq raqymshylyǵy: 1 mln-nan astam adamnyń ósimpuly keshirildi

NUR-SULTAN. QazAqparat – Qazaqstanda azamattardyń ósimpuldaryn esepten shyǵarý boıynsha salyq raqymshylyǵynyń qorytyndysy shyǵaryldy. Osy oraıda 1 mln-nan astam adamnyń 2 mlrd teńge qaryzy keshirildi. Bul týraly Qarjy mınıstrligi Memlekettik kirister komıtetinen málim boldy, dep habarlaıdy QazAqparat tilshisi.

«Memlekettik kirister komıteti 2020 jylǵy 31 jeltoqsanda jeke tulǵalarǵa múlik salyǵy, jer salyǵy jáne kólik quraldary salyǵy boıynsha salyq raqymshylyǵy aıaqtalǵanyn habarlaıdy. Jeke tulǵalar úshin ósimpuldy esepten shyǵarý boıynsha salyqtyq raqymshylyq Qazaqstan Respýblıkasynyń 2020 jylǵy 2 shildedegi zańyna sáıkes júrgizildi. Esepten shyǵarýdyń basty sharty salyq boıynsha negizgi qaryz somasyn tóleý boldy.

Ósimpuldy esepten shyǵarý úshin eshqaıda barýdyń qajeti joq edi. Qaryzdyń negizgi somasyn tóleý jetkilikti boldy jáne ósimpul avtomatty túrde esepten shyǵaryldy», - delingen komıtet málimetinde.

Máselen, 2020 jylǵy 1 qańtardaǵy jaǵdaı boıynsha 21 697 164 206 teńge negizgi qaryzy jáne 4 254 324 271 teńge mólsherinde ósimpul somasy bar 1 513 879 azamattyń salyq raqymshylyǵyna qatysýǵa quqyǵy bar bolatyn.

Jyl qorytyndysy boıynsha ósimpuldy esepten shyǵarý sharasyn 1 057 764 azamat (70%) paıdalandy, olar boıynsha 14 849 385 721 teńge (68%) mólsherinde negizgi borysh somasy tólendi jáne 2 050 503 348 teńge (48%) somasynda ósimpul esepten shyǵaryldy.

Memlekettik kirister komıteti ósimpuldardy esepten shyǵarý boıynsha aktsııa qorytyndysyna sáıkes 1 mln-nan astam azamattyń 2 mlrd teńge qaryzyn esepten shyǵardy.

Vedomstvo málimetinshe, 2020 jylǵy salyq raqymshylyǵyn paıdalanǵandardyń sany boıynsha nátıjeler 2019 jylǵy ótken salyq raqymshylyǵynyń nátıjelerinen asyp túsken (2020 jyly 1,1 mln azamat, 2019 jyly 755,7 myń azamat nemese 300,0 myń adamǵa kóp).