Salyq organdaryna bereshek memqyzmetkerler reıtıngi: Polıtseıler kósh bastady

ALMATY. QazAqparat - Almaty qalalyq Memlekettik kirister departamenti múlik salyǵyn tóleýden jaltaryp júrgen memlekettik qyzmetshilerdiń reıtıngin jasady, dep habarlaıdy QazAqparat tilshisi departamenttiń baspasóz qyzmetine silteme jasap.

Júrgizilgen taldaý nátıjesinde Almatyda 1312 memqyzmetshi múlik salyǵyn ýaqytynda tólemegeni belgili boldy. Bul reıtıngte quqyqqorǵaý organdary men áskerı qyzmetshiler kósh bastady.

Atap aıtqanda, qalalyq Polıtsııa departamentiniń 418 qyzmetkeri 8,6 mln teńge bereshek. Al áskerı bólimderdiń 346 qyzmetkeri qazynaǵa 5,1 mln teńge qaryz.

Sondaı-aq jergilikti atqarý organdarynyń 86 qyzmetkeri 2,5 mln teńgeniń,  QR Ulttyq bankiniń 83 qyzmetkeri 982 myń teńgeniń, tótenshe jaǵdaılar salasynyń 51 qyzmetkeri 556 myń teńgeniń salyǵyn tólemegen.

Boryshkerler tiziminde memleketke 7,2 mln teńge qaryz basqa da memorgandardyń 328 qyzmetkeri bar.

Departament salyq tóleýden jaltarǵan boryshker memqyzmetshilerdiń tizimin 2018 jyldyń sońynda jarııa etetin bolady.

Qalalyq MKD múlik salyǵy ýaqytynda tólenbegen jaǵdaıda qaıta qarjylandyrýdyń resmı mólsheriniń 1,25 eselengen kóleminde ósim júretinin aıtty.

Aıta ketý kerek, múlik salyǵyn óteý merzimi 2018 jyldyń 30 qyrkúıeginde aıaqtalǵan.

Al kólik salyǵyn 2018 jyldyń  31 jeltoqsanyna deıin tóleýge bolady.