Salyq organdary zańdy jáne jeke tulǵalardyń esepshottary boıynsha operatsııalardy toqtatý múmkinshilikterin ózderiniń baıýy úshin paıdalandy
Bul týraly búgin QR Ekonomıkalyq qylmysqa jáne sybaılas jemqorlyqqa qarsy kúres agenttigi janyndaǵy Sybaılas jemqorlyqqa jáne kóleńkeli ekonomıkaǵa qarsy kúres jónindegi qoǵamdyq keńes otyrysynda atalǵan vedomstvo basshysynyń orynbasary Talǵat Tatýbaev málim etti.
«Salyq kodeksiniń 609-babyna sáıkes salyq organdary salyq mindettemelerin oryndamaǵan nemese der ýaqytynda oryndamaǵan jaǵdaıda zańdy jáne jeke tulǵalardyń esepshottary boıynsha operatsııalardy toqtatý múmkinshiligine ıe. Sonymen birge salyq organdarynyń qyzmetkerleri bul basymdyqty jeke bastaryn baıytý úshin paıdalandy», - dedi T.Tatýbaev.
Máselen, ótken jyly salyq polıtsııasy organdary Atyraý qalalyq salyq basqarmasynyń bólim bastyǵyna qatysty qylmystyq is qozǵaǵan. Ol esepshotqa salynǵan tyıymdy alyp tastaý jáne qujattardy rásimdeý úshin 70 myń teńge kóleminde para alǵan.
«Bizdiń kózqarasymyzsha, salyq organdary tarabynan teris paıdalanýshylyqqa jol bermeý maqsatynda salyq tóleýshilerdiń esepshottaryna shekteý qoıý protsedýrasyn qaıta qaraý qajettigi týyndap otyr», - dedi ol.