Salyq kodeksine jańa salyq túri engizildi

ASTANA. QazAqparat - Búgin QR Qarjy mınıstrliginiń Memlekettik kirister komıteti mamandandyrylǵan basqarmasynyń bas sarapshysy Ǵalıasqar Ábýov elimizdiń jańa Salyq kodeksindegi ózgeristerdi túsindirdi, dep habarlaıdy QazAqparat.

«Jańa Salyq kodeksin ázirleý barysynda eń aldymen Memleket basshysynyń tapsyrmalaryn basshylyqqa aldyq. Ol tapsyrmalarǵa sáıkes, paıdaly qazbalardyń ósimin qamtamasyz etý úshin belsendi túrde geologııalyq barlaý jumystaryn júrgizýimiz qajet. Buǵan qosa, ekonomıkalyq ósimniń turaqtylyǵy úshin munaı-gaz jáne ken-metallýrgııa keshenderiniń mańyzdylyǵyn saqtaý  qajet boldy. Osylaısha jańa Salyq kodeksinde jer qoınaýyn paıdalaný salasyndaǵy ınvestıtsııalyq ahýaldy jaqsartý maqsatynda birneshe shara qabyldandy. Keıbir salyqtar alynyp, keıbiriniń mólsherlemeleri tómendetildi», - dedi ol.

Máselen, bas sarapshynyń aıtýynsha, 2018 jyldan bastap taý-ken sektory ústeme paıda salyǵynan bosatyldy. Qatty paıdaly qazbalardy barlaýǵa, óńdeýge lıtsenzııalar boıynsha tarıhı shyǵyndardy  óteý alynyp tastaldy.

«Salyq kodeksine jańa salyq engizilip otyr. Buryn bul salyq túri bolǵan emes. Ol jer qoınaýyn paıdalanýǵa balama salyq dep atalady. Bul salyq teńiz ben asa tereń ken oryndaryna arnalǵan. Atalǵan salyqty tóleý quqyǵyn alý úshin jer qoınaýyn paıdalanýshylar ózi tirkelgen salyq organyna habarlama  berýi qajet. Habarlama berý merzimderi kóretilgen. Habarlama bermegen jaǵdaıda jalpy tártipke sáıkes jumysyn jalǵastyra beredi. Al balama salyq 4 salyqtyń ornyna tólenetin bolady. Atap aıtqanda jer qoınaýyn paıdalanýshy ústeme paıda salyǵynan, eksporttyq renta salyǵynan, tarıhı shyǵyndardy óteý tólemderinen jáne paıdaly qazbalardy óndirý salyǵynan bosatylady», - dedi Ǵalıasqar Ábýov.