Salyq eseptiligi nysandaryn tapsyrý merzimi 31 mamyrǵa aýystyryldy

NUR-SULTAN. QazAqparat – QR Ulttyq ekonomıka vıtse-mınıstri Mádı Takıev salyqtyq ákimshilendirý salasyndaǵy jeńildikterdi túsindirdi, dep habarlaıdy QazAqparat tilshisi.

«2020 jyldyń 1 maýsymyna deıin shaǵyn jáne orta bıznes sýbektileri úshin barlyq salyqtar men bıýdjetke mindetti tólemder men áleýmettik jarnalardy (jeke tabys salyǵy, áleýmettik salyq, qyzmetker úshin áleýmettik jáne medıtsınalyq saqtandyrý) tóleýge, sondaı-aq salyq, keden jáne áleýmettik tólemder boıynsha bereshekti májbúrlep óndirip alý boıynsha jumys merzimin uzartý engizildi», - dedi M. Tákıev Ortalyq kommýnıkatsııalar qyzmetinde.

Sonymen qatar ol tótenshe jaǵdaı kezeńinde salyqtyq tekserýler toqtatylǵanyn eske saldy.

«2019 jylǵy mindettemeler boıynsha salyq eseptiligi nysandaryn tapsyrý merzimi 2020 jylǵy 31 naýryzdan 2020 jylǵy 31 mamyrǵa aýystyryldy», - dedi.

Atap aıtqanda, jalpy salyqtyq sharalar 700 myńnan astam salyq tóleýshini qamtıdy.

Budan buryn habarlanǵandaı, Mádı Takıev bıyl Qazaqstanda salyq jeńildikteri eskerilgen kásipkerlik qyzmetteri týraly aıtyp berdi.