Saltanattyń ólimi: Bıshimbaev jedel járdemge emes, balgerge habarlasqan

<p>ASTANA. KAZINFORM &ndash; Astana qalasynyń qylmystyq ister jónindegi mamandandyrylǵan aýdanaralyq sotynda ótken sot protsesinde Qýandyq Bıshimbaev aıyptaýshylardyń suraǵyna jaýap berdi.</p>

Memlekettik aıyptaýshy Aıjan Aımaǵanova Bıshimbaevtan sol túni nege birden jedel járdem qyzmetine habarlaspaǵanyn surady. Buǵan deıin aıyptalýshy sasqanynan balgerge habarlasqanyn aıtqan bolatyn.

«Jedel járdemge habarlaspaǵanym úlken qateligim boldy. Uıyqtap jatyr dep oıladym», - dedi Q. Bıshimbaev.

Budan keıin memlekettik aıyptaýshy Núkenova qoryldap, túrli dybystar shyǵara bastaǵanda nege shara qoldanbaǵanyn surady.

«Men uıyqtap jatyr dep oıladym. Sebebi, Saltanat táýlik boıy uıyqtap, qorylǵa basatyn», - dedi aıyptalýshy.

Dese de, Saltanattyń aǵasy Aıtbek Amangeldi Saltanatqa qoryldap uıyqtaý tán emes ekenin aıtyp, aıyptalýshynyń sózin joqqa shyǵardy.

Astana qalasynyń qylmystyq ister jónindegi mamandandyrylǵan aýdanaralyq sotynda ótip jatqan sot protsesi 8 sáýirde saǵat 10.00-de jalǵasady.

Eske salsaq, 2023 jyly 9 qarashada Astanadaǵy «Bau» meıramhanasynda burynǵy Ulttyq ekonomıka mınıstri Qýandyq Bıshimbaev óziniń jubaıyn soqqyǵa jyqty. Áıel jedel járdem jetkenshe kóz jumdy. Munan soń Іshki ister mınıstrligi Qýandyq Bıshimbaevtyń ustalǵanyn rastady.

Ótken jyly 15 qarashada ótken keńeste Memleket basshysy Qasym-Jomart Toqaev Іshki ister mınıstrine Q. Bıshimbaevtiń isin erekshe baqylaýǵa alýdy tapsyrdy. Bıyl 11 qańtarda elorda soty Qýandyq Bıshimbaevty kúzetpen ustaý merzimin 2 aıǵa uzartqan edi, 26 aqpanda Qýandyq Bıshimbaevtyń isi sotqa tústi.

1 naýryzda Qýandyq Bıshimbaevtyń isi boıynsha aldyn ala tyńdaý kúni belgilendi. 11 naýryz kúni Astananyń Qylmystyq ister jónindegi mamandandyrylǵan aýdanaralyq sotynda is boıynsha aldyn ala tyńdaý ótti. Aldyn ala tyńdaý 12 naýryzda jalǵasty.

27 naýryzda elordanyń qylmystyq ister jónindegi mamandandyrylǵan aýdanaralyq sotynda Q.Bıshimbaevtyń isi boıynsha alqabılerdi irikteý ótti. 29 naýryzdaǵy sot otyrysynda marqum Saltanat Núkenovanyń aǵasy Aıtbek Amangeldi kýáger retinde jaýap berip, Qýandyq Bıshimbaev pen Saltanat Núkenovanyń arasyndaǵy alǵashqy urys-kerister qalaı bastalǵany týraly málimetter aıtty jáne marqumnyń bet-álpeti kógergen sýret kórsetti.

1 sáýirdegi sot otyrysynda aıyptalýshy Qýandyq Bıshimbaev marqum S. Núkenovanyń týystarynan keshirim surady.

Sondaı-aq sot eks-mınıstr Qýandyq Bıshimbaevtyń isindegi taraptarǵa áleýmettik jelide pikir bildirýge tyıym saldy.