«Saltanat zańy» nemese ózbekstandyqtar Bıshimbaev isine qatysty qandaı pikirde

<p>TAShKENT. KAZINFORM &ndash; Eks-mınıstr Qýandyq Bıshimbaevtyń soty tek qazaqstandyqtardyń arasynda emes, sonymen qatar sheteldikter úshin de qoǵamdyq rezonans týdyrdy. Bul sot otyrysyn kórshiles el azamattary jiti baqylap otyr. Onyń ishinde bul oqıǵaǵa beı-jaı qaramaıtyn ózbekstandyqtardyń qatary qalyń, dep habarlaıdy&nbsp;Kazinform agenttiginiń Tashkenttegi menshikti tilshisi Álıhan Asqar.</p>

Kórshiles memleket turǵyndarynyń pikirinshe, bul oqıǵa máseleniń saldarymen emes, sebebimen kúreske túrtki bolýy tıis. Bul rette sot protsesi júrip jatqan oqıǵaǵa qatysty belgili ózbekstandyq kásipker, tanymal bloger Dıera Ýsmanova pikir bildirdi. Ol óziniń áleýmettik jelidegi resmı paraqshasynda Saltanat Núkenovamen bolǵan jaǵdaı kóptegen kelinshektiń qazirgi ómirinde kezdesetin shyndyq ekenin jazdy.

«Qazaqstanda bolǵan sulý qyz – Saltanattyń (Núkenova – avt.) oqıǵasy búgingi tańda kóptegen áıeldiń ómirinde bolyp jatqan shyndyq ekenin elestetý qorqynyshty. Olar ázirge ólgen joq. Sondyqtan olardyń úni shyqpaıdy, shydaıdy, ketip qalǵysy kelgenmen, qorqady. Men mundaı áıelderdi túsinemin, óıtkeni bir kezderi osyndaı jaǵdaı óz basymnan da ótken», - dep jazdy Dıera Ýsmanova Instagram paraqshasynda.

Foto: D. Ýsmanovanyń ınstagram paraqshasy

Onyń paıymynsha, mundaı jaǵdaılardyń aldyn alý úshin ár adamǵa aldymen quqyqtyq saýattylyq qajet.

«Osylaısha biz áıeldiń jeke dara tulǵa bolyp qalyptasýy, quqyqtyq saýattylyǵy jáne qarjylyq táýelsizdigi degen oıǵa qaıta oralamyz. Bul baǵyttar árqashan basymdyqqa ıe bolýy tıis», - dep túıindeıdi Dıera Ýsmanova óz jazbasyn.

Bularmen qatar, Ózbekstandaǵy buqaralyq aqparat quraldarynda da Bıshimbaevtyń isine qatysty maqalalar jıi jarııalanyp turady. Oǵan qytysty kórshiles el turǵyndary sottyń ashyq ótýi men derekterdiń zerdelenýin joǵary baǵalap, pikir qaldyryp jatyr. Osy rette ózbekstandyqtar turmystyq zorlyq-zombylyqtyń aldyn alý úshin aldymen zańnamalyq bazany qatańdatý kerek dep esepteıdi.

Sondaı-aq, taıaýda Qazaqstanda qabyldanǵan áıel quqyǵy men balalardyń qaýipsizdigin qamtamasyz etýge baǵyttalǵan zań Ózbekstan turǵyndarynyń arasynda qyzý talqyǵa tústi. Bul qujatty ózbekstandyq BAQ «Saltanat zańy» degen ataýmen jarııalady.

Artynsha Ózbekstan úkimeti de turmystyq zorlyq-zombylyq qurbandaryna kómek kórsetý mehanızimin ózgertýge kiristi. Atap aıtqanda, el prezıdenti Shavkat Mırzıeevtiń tapsyrmasyna saı, endi turmystyq «tırandardan» zardap shekkenderge úsh deńgeıli qoldaý kórsetiledi.

Onyń alǵashqysy – mahallıa deńgeıindegi kómek. Onda áleýmettik qyzmetker, profılaktıka ınspektory jáne áıelder belsendisi turmystaǵy qysym kórsetý faktilerin zerttep, jaǵdaıdy únemi qadaǵalap otyrady.

Odan keıin aýdan deńgeıinde «Inson» ortalyqtarynda qorǵaý orderin talap etpesten psıhologııalyq, quqyqtyq jáne áleýmettik qyzmetter usynylady. Aýrýhanalardyń jedel járdem bólimshelerinde qurbandarǵa arnalǵan alǵashqy járdem bólmeleri uıymdastyrylady.

Sondaı-aq, úshinshi deńgeı – oblystyq dárejede bolady. Onda áıelderdi ońaltý ortalyqtaryna ótinishsiz 6 aıǵa deıingi merzimge ornalastyryp, psıhologııalyq jáne zań qyzmetteri kórsetiledi.

Qosa ketsek, bıyl turmystyq zorlyq-zombylyq jasaǵan 4,5 myńǵa jýyq ózbekstandyq jaýapqa tartyldy.