Saltanat Tursynbekova Astanada alǵashqy úgit-nasıhat plakatyn ildi

ASTANA. QazAqparat - Búgin quqyq qorǵaýshynyń ózi Astana kóshelerine aldaǵy saılaýda ózine daýys berýge shaqyratyn alǵashqy plakatyn ilýge shyqty. Osylaısha elordada jáne elimizdiń aımaqtarynda shtab komandasy iske kirisip ketti, dep habarlaıdy QazAqparat.

Shtab qyzmetkerleri men volonterler azamattar arasynda bannerler, plakattar ilip, paraqshalar taratýda. Buǵan deıin shtab kandıdat týraly kóptegen aqparattyq materıaldar daıyndaǵan.

Sondaı-aq volonterler qyzyǵýshylyq tanytqan azamattarǵa Saltanat Tursynbekovanyń saılaýaldy baǵdarlamasyn jan-jaqty túsindirip, onyń jetistikteri men josparlary týraly aıtyp beredi.

Aıta ketý kerek, kesheden beri elordada jáne elimizdiń óńirlerinde kandıdattyń shtaby resmı túrde ashyldy.

Buǵan deıin qyzmetkerler Ortalyq saılaý komıssııasynda saılaýaldy úgit-nasıhat jumystaryn júrgizý boıynsha arnaıy semınarǵa qatysqan bolatyn. Saılaý naýqany aıasyndaǵy barlyq jumystar zańǵa sáıkes qatań júrip jatyr.

Baspa ónimderi tek arnaıy bólingen oryndarǵa ornalastyrylady.

Sonymen qatar, Saltanat Tursynbekova áleýmettik jelidegi paraqshasynda búgin ujym alǵashqy saparyna óńirlerge, onyń ishinde, Aqmola oblysyna attanýdy josparlaǵanyn habarlady. Alaıda quqyq qorǵaýshy sapardyń keıinge qaldyrylǵanyn aýa raıynyń nasharlaýynan (kóktaıǵaq) joldyń jabylýyna baılanysty dep túsindirdi.

Eske salaıyq, Ortalyq saılaý komıssııasy buǵan deıin Saltanat Tursynbekovany kezekten tys saılaýda prezıdenttikke kandıdat retinde tirkegen bolatyn.