Saltanat Núkenova 6-8 saǵattan soń alǵan jaraqattarynan kóz jumdy

<p>ASTANA. KAZINFORM &ndash; Jábirlenýshi taraptyń advokattary marqumnyń basynda 12-13 jaraqat bar ekenin aıtty.</p>

Marqumnyń denesine jasalǵan saraptama Núkenovanyń ólimi oń jaq frontemporaldy parıetaldy oksıpıtaldy aımaqta jedel sýbdýraldy gematomamen birge júretin jabyq mı jaraqaty saldarynan bolǵanyn kórsetti.

«Alynǵan jaraqattar ortalyq júıke júıesiniń jumysynyń buzylýyna, keıin toqtaýyna, júrek qyzmeti men tynys alýdyń toqtaýyna ákeldi. Bul – ólimge tikeleı sebep boldy», - dedi jábirlenýshi taraptyń advokaty J. Orazbaqova.

Qýandyq Bıshimbaev bolsa ol soqqylar Saltanat Núkenova ýnıtaz ben edenge qulaǵan kezde paıda bolǵanyn alǵa tartyp otyr. 

Aıta keteıik, Astana qalasynyń qylmystyq ister jónindegi mamandandyrylǵan aýdanaralyq sotynda ótip jatqan sot protsesinde taraptar ázirge saraptama qorytyndylaryn jarııalaýda.

Eske salsaq, 2023 jyly 9 qarashada Astanadaǵy «Bau» meıramhanasynda burynǵy Ulttyq ekonomıka mınıstri Qýandyq Bıshimbaev óziniń jubaıyn soqqyǵa jyqty. Áıel jedel járdem jetkenshe kóz jumdy. Munan soń Іshki ister mınıstrligi Qýandyq Bıshimbaevtyń ustalǵanyn rastady.

Ótken jyly 15 qarashada ótken keńeste Memleket basshysy Qasym-Jomart Toqaev Іshki ister mınıstrine Q. Bıshimbaevtiń isin erekshe baqylaýǵa alýdy tapsyrdy. Bıyl 11 qańtarda elorda soty Qýandyq Bıshimbaevty kúzetpen ustaý merzimin 2 aıǵa uzartqan edi, 26 aqpanda Qýandyq Bıshimbaevtyń isi sotqa tústi.

1 naýryzda Qýandyq Bıshimbaevtyń isi boıynsha aldyn ala tyńdaý kúni belgilendi. 11 naýryz kúni Astananyń Qylmystyq ister jónindegi mamandandyrylǵan aýdanaralyq sotynda is boıynsha aldyn ala tyńdaý ótti. Aldyn ala tyńdaý 12 naýryzda jalǵasty.

27 naýryzda elordanyń qylmystyq ister jónindegi mamandandyrylǵan aýdanaralyq sotynda Q.Bıshimbaevtyń isi boıynsha alqabılerdi irikteý ótti. 29 naýryzdaǵy sot otyrysynda marqum Saltanat Núkenovanyń aǵasy Aıtbek Amangeldi kýáger retinde jaýap berip, Qýandyq Bıshimbaev pen Saltanat Núkenovanyń arasyndaǵy alǵashqy urys-kerister qalaı bastalǵany týraly málimetter aıtty jáne marqumnyń bet-álpeti kógergen sýret kórsetti.

1 sáýirdegi sot otyrysynda aıyptalýshy Qýandyq Bıshimbaev marqum S. Núkenovanyń týystarynan keshirim surady.

Sondaı-aq sot eks-mınıstr Qýandyq Bıshimbaevtyń isindegi taraptarǵa áleýmettik jelide pikir bildirýge tyıym saldy.