«Salıqaly tańdaý, syndarly sheshim» - respýblıkalyq basylymdarǵa sholý
***
Keshe Almatyda jumys saparymen bolǵan Premer-Mınıstrdiń birinshi orynbasary Ómirzaq Shókeev turǵyn úı-kommýnaldyq sharýashylyǵyn jańǵyrtý jumystarymen jáne kúngeıdegi bas qala men Almaty oblysyndaǵy úleskerler máselesin sheshýdegi salalyq baǵdarlamalardyń oryndalý barysymen tanysty. Osyǵan oraı «Egemen Qazaqstan» gazetinde «Úleskerlerdi úmittendiretin úrdis» degen taqyryppen maqala jarııalandy. «Bıyl Almaty qalasy boıynsha 40 úı jóndelmek. Búginde onyń jıyrmadan astamynda jumys bastalǵan. Bul turǵyn úılerdi qaıta jóndeýden ótkizý qanatqaqty baǵdarlama bolǵandyqtan, istiń barysyn baıqap kórip, onyń sanyn kelesi jyldan bastap eki-úsh esege kóbeıtý kózdelýde. Bıyl atalmysh baǵdarlamaǵa respýblıka boıynsha 7,5 mlrd. teńge bólinse, kelesi jyly 16 mlrd. teńge qarastyrylmaq», - dep jazady basylym.
Keshe elimizdiń barlyq oblys ortalyqtary men Astana jáne Almaty qalalarynda Parlament Senatynyń saılaýy ótti. Túrli deńgeıdegi máslıhattardyń depýtattary balamaly negizde saılaýǵa túsken úmitkerlerdiń arasynan óz tańdaýyn jasady. Parlament Senaty depýtattarynyń saılaýy jaıynda tolyq aqparatty «Egemen Qazaqstan» gazetiniń búgingi nómirinen oqýǵa bolady. Elimizdiń Astana men Astana qalalarynda jáne 14 oblysynda ótken saıası doda jaıyndaǵy maqalalar toptamasy «Salıqaly tańdaý, syndarly sheshim» degen ortaq taqyryppen berilgen. Sondaı-aq basylymda Ortalyq saılaý komıssııasynyń aldyn ala qorytyndylary da jaryq kórdi.
***
«Aıqyn» gazetinde «Islam: bereke men birlik negizi» degen taqyryppen kólemdi maqala jarııalandy. Oqyrman qaýymǵa ıslam dinin jan-jaqty nasıhattaý maqsatynda jazylǵan maqala: «Qazaqstanda dinı tanymǵa degen yqylas artqan saıyn, talǵam shette qalyp, túrli aǵymdardyń jeteginde kete barǵan qazaq jastarynyń bolashaǵy birtindep bulyńǵyrlanyp barady. Syrttan kelgen dinı mıssıonerler memleketimizdiń dinı senim bostandyǵy quqyǵyn, adamdardyń óz erkine berip qoıǵanyn sezingendikten óz nasıhattaryn erkin kúsheıte tústi. Bul kezekte, qazirgi tańda Qazaqstanda dinı ekstremızm jáne lańkestiktiń taralý qaýpi úlken másele bolyp tur. Onyń bir saldary mıssıonerler arnaıy psıhologııalyq daıyndyqtan ótken, sheteldik mamandar deýge bolady. Olar qoǵamnan shettep qalǵan, ıaǵnı ekonomıkalyq jaǵdaıy óte tómen, sonymen qatar jumyssyz júrgen, ózindik qyzyǵýshylyqtan jurdaı, kózinde mazmun joq adamdardy tańdaı otyryp, ózderiniń «kıeli» sózderiniń qulyna aınaldyrýda», - delingen.
«Ertóstik-Mıras» balalar hory Germanııanyń Vernıgerod qalasynda ótken Iohannes Brams atyndaǵy VІІ halyqaralyq balalar hory konkýrsynan eki birdeı kúmis júldemen oraldy», - dep jazady «Aıqyn» gazeti búgingi sanyndaǵy «Ákim qoldaǵan órender elge júldemen oraldy» degen taqyryptaǵy maqalasynda. Basylymnyń jazýynsha, álemniń birneshe memleketinen ónerli órender qatysqan sharada «Ertóstik-Mıras» balalar qory bıyl tórtinshi márte baq synap, «Dinı áýender», «Balalar hory» atalymdarynda qos kúmiske qol jetkizip otyr. Qazylar alqasy men uıymdastyrý alqasy qazaqstandyq jetkinshekterdiń shyǵarmashylyǵyn erekshe atap ótip, «Ertóstik-Mıras» balalar horyn Germanııaǵa arnaıy shaqyryp, týrne ótkizýge usynys bildiripti.
***
«Keshe QR Premer-Mınıstri Kárim Másimovke «Qazaqstan Respýblıkasynyń keıbir zańnamalyq aktilerine zııatkerlik menshikti damytý men qorǵaý tetikterin jetildirý máseleleri boıynsha ózgerister men tolyqtyrýlar engizý týraly» zań jobasy tanystyryldy», - dep jazady «Kazahstanskaıa pravda» gazeti. Basylymnyń atap ótýinshe, Ádilet mınıstri Rashıd Túsipbekov zań jobasyn usyna otyryp, onyń Memleket basshysynyń 2011 jylǵy 17 sáýirde Úkimettiń keńeıtilgen otyrysynda bergen tapsyrmasyn oryndaý maqsatynda ázirlengenin atap ótti. Zań jobasynyń maqsaty zııatkerlik menshikti damytý men qorǵaý tetikterin odan ári jetildirý bolyp tabylady. Zań jobasy taýar tańbalaryn tirkeý týraly ótinimderge aldyn ala saraptama jasaý merzimin eki aıdan bir aıǵa deıin qysqartýdy jáne taýar tańbalaryn tirkeýden bas tartý úshin 13 absolıýttik negizdiń 9-yn alyp tastaýdy kózdeıdi.