«Salamatty Qazaqstan» poıyzynyń dárigerleri Altaı aýdanynyń halqyn qabyldap jatyr – fotoreportaj

ALTAI. QazAqparat – «Salamatty Qazaqstan» poıyzy Shyǵys Qazaqstan oblysyndaǵy Altaı beketine keshe túnde kelgen. Búgin mine tańerteńnen jergilikti turǵyndardy qabyldap, medıtsınalyq kómek kórsetýdi bastap ketti, dep habarlaıdy QazAqparat tilshisi.

Altaı aýdanynyń túkpir-túkpirindegi eldi mekenderden kelgen jurt tańǵy 8-den poıyz mańyna toptasty. Aq halattylardy olar shashýmen qarsy alyp, nannan dám aýyz tıgizdi.

Aýdan ákimdigi kópten kútken qonaqtarǵa arnap kishigirim kontserttik baǵdarlama uıymdastyrypty. Áýeletip án shyrqalyp, jınalǵandardyń kóńili bir serpilip qaldy.

«Aýyldardy aralap, ozyq qurylǵylarmen halyqty emdeıtin medıtsınalyq poıyzdy bári kútetindigi ras. Jalpy sońǵy jyldary elimizde densaýlyq saqtaý salasyn damytýǵa kóp kóńil bólinip jatyr. Sebebi deni saý ult qana memleket bolashaǵynyń kepili bola alady. Búgin sizderdi Altaı jerinde kórgenime shyn júrekten qýanyshtymyn! Jumystaryńyzǵa sáttilik tileımin», - dedi Altaı aýdany ákiminiń orynbasary Janna Asqarova qarsy alý sózinde.

Sodan soń «Salamatty Qazaqstan» poıyzynyń bas dárigeri Aınur Eginbaeva altaılyqtardyń qandaı dárigerlerge qarala alatyndyqtaryn túsindirip berdi.

«Poıyzda terapevt, stomatolog, pedıatr, oftalmolog, hırýrg, ýrolog, lor, mammolog syndy mamandar bar. Odan keıin túsken keıin zańger men medıator keledi. Olardan da ózderińizge qajetti keńes ala alasyzdar. Esh aqysyz. Tek jeke kýálikterińiz bolsa jetkilikti», - dedi ol.

Saǵat 09.00 shamasynda 50-ge jýyq adam relstegi emhanaǵa kezek-kezek bas suqty. Túske deıin de jáne keıin de taǵy da jurttyń aǵylatyny anyq. Poıyz bul stantsııada eki kún bolady.

«Altaı aýdanynyń tabıǵaty tamasha eken. Bıik taýlarǵa, qalyń aǵashqa qarap kóz toımaıdy. Ózim negizinen Astana qalasynda turamyn. Osy poıyzda jumys istegenniń arqasynda Qazaqstannyń talaı jerin aralap shyqtyq. Altaı halqy óte sabyrly, mádenıetti eken. Kezekte turǵanda da ázirge eshqandaı daý-damaı bolǵan joq», - dep medıtsınalyq poıyzdyń menedjeri Arystan Qýandyqov QazAqparat tilshisine óz áserin bólisti.

8 vagonnan turatyn poıyzda zerthana, kishigirim ota bólmesi bar. Bıohımııalyq taldaýlar jasap, ishki aǵzalardy ýltradybystyq zertteýden ótýge de múmkindik jasalǵan. Munda barlyǵy 12 dáriger jumys isteıdi. Aq halattylardyń basym kóbi Astana qalasynan.

«Salamatty Qazaqstan» poıyzy Shyǵys Qazaqstan jáne Abaı oblystaryn 12 maýsymǵa deıin aralaıdy.

Aıta keteıik, áleýmettik jobanyń negizgi aqparattyq seriktesi - QR Prezıdentiniń Teleradıokesheni.