«Salamatty Qazaqstan» poıyzy toqtaǵan ár beketke halyq mol jınalýda – medıtsınalyq poıyzdyń bas dárigeri

ÓSKEMEN. QazAqparat – Almatydan shyǵyp Qazaqstannyń ár túkpirin aralaıtyn «Salamatty Qazaqstan» poıyzy 23 mamyrdan beri Shyǵys Qazaqstan jáne Abaı oblystarynyń beketterinde aıaldap júr. Bilikti medıtsınalyq mamandar toptastyrylǵan relstegi emhana 1 maýsym kúni Altaı aýdany Zýbovsk eldi mekeninde ornalasqan bekette toqtap, halyqty tańerteńnen keshke deıin qabyldady. Sol jerge arnaıy barǵan QazAqparat tilshisi medıtsınalyq poıyzdyń bas dárigeri Aınur Eginbaevamen suhbat qurǵan edi. Onyń aıtýynsha, aq halattylar 6 jeltoqsanǵa deıin oblys, aýdan ortalyqtarynan shalǵaı jerde ornalasqan 121 stantsııaǵa barady.

- «Medıtsınalyq poıyz» jobasyna qatysyp, aýyl-aımaqty aralap júrgenińizge qansha boldy?

- 2019 jyldan beri osy joba boıynsha jumys istep kelemin. Bıylǵy saparymyz 26 sáýirde «Almaty 2» beketinen bastaý aldy. Osyǵan deıin Almaty, Jetisý, Abaı oblystaryn júrip óttik. Endi Shyǵys Qazaqstan jerine jol túsip otyr. Joba «Samuryq-Qazyna» AQ kompanııalar tobynyń atynan «Samruk-Kazyna Trust» áleýmettik jobalardy damytý qory, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń jáne Densaýlyq saqtaý mınıstrliginiń qatysýymen, «Qazaqstan temir joly» UK» AQ janyndaǵy «Áleýmettik jobalar qory» korporatıvtik qorymen jáne aqparattyq seriktes - Prezıdent teleradıokeshenimen birge júzege asýda.

Bul qaıyrymdylyq joba deýge bolady. Sebebi elimizdiń ár óńirin aralap, alystaǵy halyqqa esh aqysyz medıtsınalyq kómek kórsetilýde. Demalyssyz jumys isteımiz. Senbi-jeksenbi kúnderi de turǵyndardy qabyldaı beremiz. Poıyz ár stansada 1-2 kún turady. Eger úlken beket bolsa eki, kishi bolsa 1 kún aıaldaımyz. Jospar boıynsha 6 jeltoqsanǵa deıin oblys, aýdan ortalyqtarynan shalǵaı jerde ornalasqan 121 stantsııaǵa baramyz.

- Poıyzda qandaı medıtsınalyq mamandar bar?

- Nevropatolog, okýlıst, stomatolog, ýrolog, hırýrg, akýsher-gınekolog, jalpy tájirıbelik dáriger, terapevt, pedıatr, oftalmolog, lor, mammolog syndy mamandar bar. Uzyn sany 12 dáriger. Budan bólek, osy jyldan bastap qatarymyzǵa zańger men medıator qosyldy. Halyq olardyń da keńesin tegin ala alady. Dárigerlerdiń 80 paıyzy Astana qalasynan, qalǵandary Almatydan jınalǵan. Olar segiz aı boıy osy poıyzda úzilissiz eńbek etedi. Byltyr «Járdem» poıyzymen aýyldardardy aralaǵan bolatynbyz. Sol kezde Ońtústik pen Batys jaqty júrip óttik. Ózim osy 4 jylǵa jýyq tájirıbemde Shyǵys Qazaqstan oblysyna alǵash ret taban tirep otyrmyn.

Poıyzda 8 vagon bar. Onyń tórteýinde medıtsınalyq jabdyqtar bolsa, bireýinde sol jabdyqtardy toqpen qamtamasyz etetin dızel tur. Bir vagonda aq halattylar, ekinshisinde jolserikter jatady, endi bir vagonda bárimiz as-sý ishetin restoran ornalasqan.

- Medıtsınalyq jabdyqtardy atap ótseńiz?

- Poıyz zamanaýı dıagnostıkalyq jáne emdeý jabdyqtarymen, ÝDZ-men, flıýorografııalyq apparatpen, shaǵyn ota zerthanasymen, ınternetke symsyz qosylýǵa múmkindik beretin baılanys quralymen jabdyqtalǵan.

- Shyǵys Qazaqstan oblysyna birinsh i ret keldim dep qaldyńyz. Sýy da nýy da mol, taýlary aspanmen astasqan aımaqtan qandaı áser alyp jatyrsyz?

- Tabıǵatyna sóz joq. Kóz toımaıdy eken. Qaraı bergiń keledi. Buryn basqa óńirlerge barǵanda jol boıy uıyqtap kelsek, qazir tipti terezeden bas almaımyz. Perdeni ashyp tastap, otyrǵandar otyryp, keıbireýler eki aıaqqa tik turyp tabıǵatty tamashalap kele jatyrmyz. Óleń qosyp qoıamyz da terezege telmirip qalamyz. Naǵyz peızaj.

Halqy da jaqsy. Óte mádenıetti, sypaıy, saýatty. Kezekte turǵandar bir-birin syılaıdy, bireýdi attap ketkenderdi kórmedim. Bul bizdiń jumysymyzdy da jeńildetedi. Sebebi vagon ishindegi tar jerde daý-damaı shyqsa, jurt birin-biri ıterip jatsa, onda olardy tez-tez qabyldaý múmkin emes.

- Poıyzǵa bas suǵyp jatqan halyq kóp pe?

- Ár bekette halyq mol jınalyp jatyr. Birde-bir ret adam az bolǵan emes. Eń kóbi bir kúnde 600-ge jýyq adam kelse, eń azy 100 shamasynda boldy. Árbir adamǵa tolyqqandy kómektesýge tyrysamyz. Bizge tek jeke kýáligimen kelse bolǵany. Jan-jaqty tekserip, em taǵaıyndap beremiz.

- Azamattar kóbine qaı dárigerge qaralyp jatyr?

- Ár jerde árqalaı. Mysaly, osyǵan deıin toqtaǵan Taýsamaly beketinde flıýrografııadan ótkender kóp boldy. Keı jerde okýlıstke suranys joǵary.

- Sizderge kelgen eń jas jáne eń jasamys patsıent?

- Anasy bir aılyq balasyn alyp keldi. Profılaktıkalyq maqsatta qaralyp shyqty. Náresteniń densaýlyǵynan eshqandaı kinárat anyqtalǵan joq. Al eń egdesi 91 jasta boldy. Bir aıta keterligi, Shyǵys Qazaqstanda uzaq jasap kele jatqan qarttarymyz kóp eken. Ony ár beketten baıqap kelemiz. 80-90 jas aralyǵyndaǵy zeınetkerler poıyzymyzǵa jıi kelýde.

- Áńgimeńizge kóp rahmet!